Нашиот Пали Колефски ќе ја води Општина Пустец. Македонец, социјалдемократ, другар, борец за соработка меѓу албанскиот и македонскиот народ. Честитки за Еди Рама и за Социјалистичката партија на Албанија за победата во Пустец и за победата низ мнозинството од општините низ Албанија. Честитки и на Македонската Алијанса за европски интеграции и претседателот Васил Стерјовски кои ја подржаа кандидатурата на Колефски и придонесоа кон неговата победа, објави на Фејсбук Бојан Маричиќ.
На вчерашните локални избори во Албанија, довербата да биде прв човек на општина Пустец жителите повторно му ја доверија на Пали Колефски, кој и во изминатите четири години беше на чело на општината.
Тој во објава на Фејсбук се заблагодари и порача дека „Преспа ќе продолжи да живее” и оти жителите на општина Пустец го избрале најдоброто.
-Драги мои, прво да ви се заблагодарам на огромната и безрезервна поддршка на овие избори. Продолжуваме со макотрпна работа, продолжуваме да работиме за општина Пустец да стане уште подобро место за живеење. Оваа победа не е само моја, оваа победа е ваша, оваа победа е за сите нас заедно. Уште еднаш ви благодарам од се срце, напиша Колефски на Фејсбук.
Според првичните информации, за Колефски гласале 63,8 отсто, додека за неговиот противкандидат Панди Јани 36, 2 отсто.
Пали Андон Колефски (43) на изборите беше кандидат на Социјалистичката партија, поддржан од Македонската алијанса за европска интеграција (МАЕИ).
Панди Таќо Јани (31) беше кандидат на Партијата на слободата која ја предводи опозициската изборна коалиција „Заедно победуваме”.
