Во текот на изминатите три дена, одбранбените сили на Украина напредуваа во некои области на фронтот од 200 метри на 1,4 километри и ослободија површина од околу три квадратни километри, објави украинскиот Воен медиумски центар на Телеграм, повикувајќи се на портпаролот на Генералштабот на украинските вооружени сили Андриј Ковалиов, пренесува Укринформ.
„Во правец на Бердијанск, борбите продолжуваат во областа на селото Макаривка. Во тек се битки и во областа на селата Новоданиливка и Новопокровка“, рече Ковалиов.
Забележано е дека руските сили го зголемиле бројот на проектили и воздушни напади. Конкретно, синоќа тие лансирале крстаречки ракети Kh-22, крстосувачки ракети на море Калибр, а употребиле и беспилотни летала Шахед за напад на инфраструктурните објекти во регионите Харкив, Доњецк, Кировохрад и Одеса.
Ноќта на 14 јуни, украинските сили за воздушна одбрана уништија 3 од 4 руски крстосувачки ракети Калибр, како и 9 од 10 беспилотни летала Шахед-136/131.
„Конкретно, од водите на Црното Море, непријателот истрела крстосувачки ракети Калибр кон Одеса. Соборени се три проектили, додека еден погодил цивилен објект. Од источниот брег на Азовското Море, руските сили лансираа 10 нападни беспилотни летала Шахед-136/131 од иранско производство во јужниот правец“, се наведува во извештајот на украинскиот Генералштаб.
Подготви: Ј. Ѓ.
