„Иницијативата за капитални дотации во локалните самоуправи не е ништо ново во програмата на Министерството за култура, меѓутоа она што е ново е тоа што оваа година, таа ставка изнесуваше околу 40 милиони денари кои што се распределија на конкурс. Досега, оваа ставка односно средствата кои се наоѓале биле многу малку и тие побарувања никогаш не можеле да бидат истакнати“ рече министерката за култура, Бисера во утринската емисија на Канал 5.
Таа истакна дека средства биле доделени на девет општини и изрази задоволство што локалните самоуправи покажеле голема свест во однос на растот на културата и инфраструктурата која што е потребна за развој на културата бидејќи тоа претставува еден вид на спој меѓу локалната самоуправа и централната власт.
Министерката Костадиновска-Стојчевска објасни дека таму каде што немало проекти, ќе се започне со изработка на проектна документација, а таму каде што веќе има ќе се продолжи и поддржи изградбата или реконструкцијата на објектите за култура.
„На пример, во Општина Делчево, Домот за култура АСНОМ, прв пат после неговата изградба, после 50 години добива средства за реконструкција на еден дел, односно влезниот дел, холот и дел од сцената. Наредната година таму можеме да продолжиме понатаму. Во Општина Валандово, каде што во центарот за култура има навистина голем број на настани, оваа година ќе добие и кино сала односно тоа се предвидува со парите од оваа ставка“ рече Костадиновска-Стојчевска.
Таа истакна дека во село Тресноче, во Маврово и Ростуше, ќе се реконструира старото училиште во еден мултифункционален дом каде што ќе продолжи да се слави делото на Дичо Зограф.
„Општина Кратово која претставува еден град – музеј. Таму не постои еден дел од општината каде што нема некоја култура историја, каде што нема некој амбиент кој вреди да се сочува, да се истакнува понатаму. Таму овозможуваме сцена и неколку дрвени поставки кои ќе им овозможат на младите уметници, на сите кои работат и културно делуваат во Кратово да добијат еден мултифункционален пристап кон она што го прават“ рече Костадиновска-Стојчевска.
