Пишува: ГАБРИЕЛА ТОЧКО
Во секојдневниот живот, особено преку социјалните мрежи, се среќавам со огромен број на текстови, објави и коментари кои повикуваат на зачувување на македонскиот идентитет, јазик, територија… со еден збор на „македонштината“.
Оние кои се најгласни и најжестоки борци за „македонштината“ најчесто во нивниот вокабулар поседуваат голем арсенал на погрдни зборови, закани, повици за линч, говор на омраза, и што е најважно истите тие се крајно неписмени.
Епа драги мои лажни патриоти, „македонштината“ не се брани само со плукање и навреда кон неистомислениците, Шиптарите, Бугарите, Грците, новинарите, политичарите, јавните личности…
Пред да напишете и кажете нешто, прво проверете што сте напишале и кажале (ако воопшто имате капацитет за тоа). За да се одбрани сопствената земја и се што е нејзино, логично е дека прво треба да се познава нејзиниот литературен јазик. Точно така, мислам на МАКЕДОНСКИОТ ЛИТЕРАТУРЕН ЈАЗИК.
Многу е контрадикторно кога вие „големите“ МАКЕДОНЦИ обвинувате некој „шиптар“ дека е „озлогласен душман на Македонија и македонштината“, а истиот тој „шиптар“ зборува и пишува на чист македонски литературен јазик.
Ако веќе сакате да се покажете во вистинско светло и дека навистина ја сакате својата татковина, тогаш не навредувајте, не се заканувајте и користете го правилно јазикот и правописот за кои грчевито се борите.
Не смеете да бидете во првите борбени редови доколку не знаете дека не се пишува „преДТци“ туку се „предци“, дека не е „спремале“ туку „подготвиле“, дека не е „поодавна“ туку „одамна“, дека нема „след 1945 година“ туку „по 1945 година“. Многу срамно!!!
Не смеете да бидете во првите борбени редови доколку повикувате некој „на кол да се надене“ или „кој прв ќе го сретне копилето шиптарско да го реши“. Доколку за која било жена напишете дека е „глупа“, „кучка фашистичка“, дека „треба да виси некаде“.
Како ли живеете со толку многу омраза во себе и со толкава неписменост? Веројатно недостатокот на образование и љубов во вашето опкружување се виновници за енормна злоба и фрустрација.
Ова се само мал дел „борци за македонштината“ ставени на ѕидот на срамот, а ги има многу, за жал.
Посветете повеќе време и внимание на себе си, верувајте дека ќе бидете посреќни луѓе. Едуцирајте се и сакајте го својот јазик. Запаметете дека народот е личната карта на една држава, ама со вакви единки останува само грдата фотографија.
Затоа ова лето препорачана литература нека ви биде „О писменех“ (За буквите) од Црноризец Храбар. Се надевам ме разбравте!!!
Извор: Цивил Медиа
