Денеска во работна посета на компаниите „Везешари“ и „Лекер’ беше Неговата Екселенција Дане Талески, Амбасадорот на Република Северна Македонија во НАТО во придружба на Министерот советник во Постојаната делегација на Северна Македонија во НАТО господинот Исмаил Ебипи – информираат од компанијата и додадаваат дека при посетата се разговарало за тековното работење на компаниите, производствените процеси, имплементираните стандарди за квалитет и безбедност на храната, тековните инвестиции и понатамошните планови за развој. Посебно внимание се даде на можностите за економска соработка и пласман на производи и услуги на НАТО силите.
Со членството на Република Северна Македонија во НАТО – Алијансата и по усогласувањето на домашното Законодавство, домашните компании имаат можност да учествуваат на набавките објавени за потребите на НАТО и земјите-членки, чија вредност надминува 5 милијарди евра годишно.
ВО Министерството за одбрана функционира Центар за поддршка на компаниите при учество на тендерите на Алијансата кој нуди целосна, сеопфатна поддршка за секоја домашна компанија која ќе пројави интерес.
Една од домашните компании која веќе има искуство како добавувач е Живинарската фарма „Везешари“ од село Требош – Тетовско.
Сопственикот на компанијата, Арбен Абдурахмани посочува дека продажбата на домашните производи во НАТО е одлична можност за македонските компании за пласман на производите и зголемен профит.
-Ние веќе неколку години продаваме јајца во НАТО преку компании кои се јавуваат на тендери наменети за снабдување на кујните за војниците. Се заинтересиравме за процедурата, ги исполнивме условите, дојде комисија која ја утврди фактичката состојба во фармата, дали ги исполнуваме нивните утврдени стандарди и ја добивме дозволата со која можат компаниите да купуваат јајца од кај нас. Оваа процедура на следливост на производот, значи од набавката на еднодневно пиле, квалитетот на храната за кокошките, условите во кои се одгледуваат и технологијата до произведено јајце, комисијата на НАТО ја врши секоја година и со тоа ни го продолжува одобрувањето – вели за Агротим, Абдурахмани и додава дека македонските компании треба да работата да можат да ги исполнат условите и затоа ги охрабрува да ја искористат оваа можност.
-Се разбира дека имаме голем бенефит од соработката со НАТО на економски план, за нас тоа знaчи уште еден силен пазар, каде што, доколку имате квалитет, ќе имате и профит. Оттука, за поздравување е функционирањето на НАТО Центар за поддршка на домашните компании во Министерството за одбрана. Ние бизнисмените треба да ги користиме сите мерки на Владата кои се во интерес на зголемување на домашното производство, не само во земјоделскиот сектор – истакна Абдурахмани.
И искуството на сите земји членки покажало дека со вклучувањето во НАТО, покрај зацрврстување на безбедноста, се остваруваат и бројни економски бенефити за државата.
Преземено од Агротим
Поврзано:
