„После посетата на високиот американски дипломат Габриел Ексобар, можноста за изгласување на уставни измени за влез на Бугарите во Уставот како услов без кој не се може да се продолжат европреговорите на Македонија со ЕУ, прозорецот на можности за решавање на ребусот се повеќе ќе се стеснува, со очигледна можност и да се затвори целосно“, вели за „Фронтлајн“ – политичкиот аналитичар Благојче Атанасоски, зборувајќи за можноста дел или цела пратеничка група на опозициската ВМРО-ДПМНЕ да рефлектира за интересите на државата и граѓаните и да дава поддршка за да се изгласат потребните уставни измени за земјата да чекори без пречки на патот кон Европската Унија.
– Едноставно, во овој даден момент за опозицијата, односно за нејзиниот лидер Христијан Мицкоски е политички опортуно да опстои на неизгласување на уставните измени поради политичкиот рејтинг, но тоа ќе го чини долгорочно политичка кариера, лидерот на опозицијата, бидејќи со тоа директно се спротивставува на високиот американски интерес на Балканот и (не) свесно игра за рускиот или руско-српскиот. Тоа Американците нема да му го заборават, а последиците ќе видиме какви ќе бидат по него и неговата партија. За Македонија ќе бидат катастрофални ако влезе во нов замрзнат конфликт со источниот сосед на патот кон ЕУ и биде блокирана со децении, а нашиот западен сосед Албанија да ги почне сама европреговорите без нас…, потенцира Атанасоски.
Поранешниот пратеник Зуди Џелили смета дека од особено значење е влезот на земјава во ЕУ. Според него, поддршка како држава ни доаѓа од сите страни, останува само да се изгласаат уставните измени и да се почне процесот.
– За уставните измени потребна е поддршка од македонската опозиција, мора да покажат одговорност, барем еднаш да помогнат да се надмине оваа блокада. ВМРО-ДПМНЕ мора да гласа, може да се случи да гласа цела пратеничка група или да оди со одредени пратеници. Зошто да гласаат? Бидејќи долго ја чекавме оваа шанса, немаме друга перспектива, сите партии се изјаснија дека се за европска иднина, затоа што ако не се изгласат уставните измени остануваме изолирани и тогаш секогаш може да се отвораат други проблеми. Има многу причини зошто треба да гласаат, со еден збор заради иднината на луѓето што ги претставуваат, изјави Џелили за „Фронтлајн“.
Министерот за надворешни работи Бујар Османи вели дека е убеден оти процесот за уставните измени во државава ќе заврши успешно во наредните недели и месеци.
– Процесот е започнат, како што гледате целиот свет, и САД и ЕУ, ја поздравија одлуката да го започнеме процесот. Убеден дека овој процес ќе заврши успешно во наредните недели и месеци, изјави Османи на маргините на Бледскиот стратешки форум.
Вицепремиерот за европски прашања Бојан Маричиќ изјавил дека наша обврска како држава е да ја искористиме позитивната атмосфера и во пресрет на европските избори да ја загарантираме нашата европска перспектива.
– Целта ни е да продолжиме со преговорите и да успееме, со обединетост и одговорен пристап кон спроведување на реформите и задачите кои ги имаме на патот до ЕУ, нагласил Маричиќ.
Претседателот на Владата на Република Северна Македонија, Димитар Ковачевски по учеството на Бледскиот стратешки форум, во изјава за МИА, истакна дека носењето на одлуки во Собранието, односно гласањето за процесот за евроинтеграции на Северна Македонија беа и во светло на форумот во Блед. Премиерот ја истакна важноста на пораката од претседатетлот на Европскиот совет Шарл Мишел дека 2030 година би можела да биде година на проширување на ЕУ, како и на хрватскиот премиер Андреј Пленковиќ и на специјалниот претставник на Обединетото Кралство за Западен Балкан, Сер Стујард Пич.
– Во однос на самиот процес беше јасно кажано дека критериумите за пристапување се тие коишто се практично и наведени во нашата преговарачка рамка. Реформскиот процес е она од што зависи самиот процес на пристапување и дека за нас како земја кандидат за членство остануваат оние обврски коишто ги имаме, а ЕУ исто така да ги исполни своите обврски. Затоа и повиците за носење на одлуки во Собранието, односно за давање глас за европските интеграции стануваат сè поактуелни во светло на она што денес го слушнавме во Блед. Овде се потврди уште една значајна работа, а тоа е дека Северна Македонија има големи пријатели во ЕУ. Северна Македонија има пријател во САД и ако ги погледнете пораките и на високиот претставник на САД кој само пред два дена беше во Скопје и овие пораки коишто денес ги слушнавме и вчера од претседателот на Европскиот совет, се работи за истите пораки коишто практично претставуваат повик за земјите кандидати да го направат она што се однесува на нив во делот на пристапувањето кон ЕУ, изјави премиерот Ковачевски.
Претседателот на Европскиот совет Шарл Мишел нагласил дека е убеден и уверен дека иднината на Северна Македонија е во ЕУ. Мишел оцени дека односите меѓу Северна Македонија и ЕУ се одлични.
– Северна Македонија и ЕУ имаат одлични односи и тука би сакал да му честитам на премиерот за неговата одлука да ги поднесе до Собранието уставните измени. Убеден сум и уверен дека иднината на Северна Македонија е во ЕУ, изјавил претседателот на Европскиот совет.
Од друга страна српската државна телевизија РТС отворено се вклучи во пропагандата против уставните измени во Македонија кои се задолжителен услов за почеток на преговори во Скопје за членство во ЕУ, пишува БГНЕС од Белград.
Во опширниот извештај, кој беше насловен „Дали Македонците ќе станат малцинство во татковината“ РТС, според БГНЕС, сугерира дека „Бугарите го оспоруваат идентитетот на Македонците”.
Дестан Јонузи
