Корејскиот Полуостров е „на работ на нуклеарна војна“, особено поради „неразумните постапки“ на САД, предупреди денеска на Генералното собрание севернокорејскиот претставник во ОН и затоа неговата земја нема избор туку да ја забрза сопствената самоодбрана, објавија американските медиуми.
„2023 година е запаметена како исклучително опасна“, истакна амбасадорот Ким Сонг на последниот ден од годишната седница на ОН, на која се собраа лидерите на 193 земји ширум светот.
„Неразумните акции“ и „постојаната хистерија на САД и нивните сојузници во однос на нуклеарниот конфликт (…) го водат Корејскиот Полуостров кон воена ситуација на работ на нуклеарна војна“, изјави тој.
„Под такви околности, КНДР (Демократска Народна Република Кореја) треба итно да го забрза градењето на своите капацитети за самоодбрана со цел да не биде поразена“, рече Ким пред Генералното собрание.
Северна Кореја тестираше десетици балистички ракети во изминатите 18 месеци.
САД долго време предупредуваат дека Пјонгјанг е подготвен да изврши седма нуклеарна проба.
Пјонгјанг тврди дека го користи своето право на самоодбрана со тестирање балистички ракети за да го зачува својот суверенитет и безбедност од воени закани.
Покрај САД, тој ја именуваше и соседна Јужна Кореја, која е американски сојузник.
Сеул е „опседнат со тоа свесно да биде поданик на САД и да се вклучи во братоубиствена конфронтација“, рече Ким, според АФП.
КНДР е под серија санкции на Советот за безбедност на ОН поради нејзината нуклеарна и ракетна програма од 2006 година, а мерките беа заострени во последниве години.
Меѓутоа, во последните седум години, 15-члениот Совет за безбедност беше поделен околу тоа како да се справи со Пјонгјанг. Русија и Кина, кои заедно со САД, Велика Британија и Франција имаат право на вето, тврдат дека новите санкции нема да помогнат и сакаат таквите мерки да се олеснат.
Кина и Русија оценуваат дека заедничките воени вежби на САД и Јужна Кореја само го провоцираат Пјонгјанг. Од друга страна, Вашингтон ги обвинува Пекинг и Москва дека ја охрабруваат Северна Кореја со тоа што ја штитат од нови санкции.
Г. Т.
