Шефот на европската дипломатија, Жозеп Борел, денеска во Брисел, по средбите со лидерите на Србија и Косово, изјави дека дијалогот е единствениот начин да се дојде до решение и дека од тоа зависи европскиот пат на двете страни.
-Работата е во тек. Можеби ќе треба да го напуштам Самитот на ЕУ за повторно да се сретнам со лидерите на Косово и Србија за да видиме дали можеме да најдеме решение во рамките на дијалогот. Нема друго решение. Европскиот пат на Косово и Србија поминува низ овој дијалог, изјави Борел по пристигнувањето на состанокот на лидерите на Унијата и нејзините членки, пренесе Бета.
Тој на Самитот на ЕУ дојде од хотелот каде заедно со други претставници на ЕУ и лидерите на Германија, Франција и Италија одвоено разговараше со претседателот на Србија, Александар Вучиќ и со премиерот на Косово, Албин Курти.
Борел, специјалниот претставник на ЕУ за Западен Балкан, Мирослав Лајчак, претседателот на Европскиот совет, Шарл Мишел и лидерите на Франција, Германија и Италија, Емануел Макрон, Олаф Шолц и Џорџа Мелони, разговараа со Курти и Вучиќ околу половина час.
Дипломатски извори за Радио Слободна Европа изјавија дека Шолц, Макрон и Мелони, како и Борел, изразиле подготвеност привремено да го напуштат Самитот на ЕУ и да се вратат на разговорите со Вучиќ и Курти доколку нивното присуство придонесе за напорите.
Претседателот на Европскиот совет, Шарл Мишел денеска изјави дека деескалација и нормализација на односите помеѓу Белград и Приштина е од суштинско значење.
– Со високиот претставник на ЕУ за надворешна политика, Жозеп Борел и колегите од ЕУ, имав средба со премиерот на Косово, Албин Курти, а потоа и со претседателот на Србија, Александар Вучиќ. Деескалација и нормализација на односите помеѓу Белград и Приштина е од суштинско значење, напиша Мишел на платформата Икс.
Тој изјави дека очекува Европската комисија дополнително да разговара на таа тема.
