(ВИДЕО) Кулеба, МНР на Украина: Не ја повторувајте лагата дека „Русија нападнала затоа што Украина сакала да влезе во НАТО“ – тоа не соодветствува со фактите

Министерот за надворешни работи на Украина, Дмитро Кулеба, во видео обраќање за помалку од пет минути докажа со факти дека  двете изјави, кои ги циркулираа руските пропагандисти, дека Русија била принудена да ја нападне Украина затоа што Украинците сакале да влезат во НАТО и дека НАТО вети дека нема да се прошири на исток, но подоцна го прекрши ова ветување, се лажни.

Понекогаш слушам луѓе кои велат дека Русија била принудена да ја нападне Украина затоа што Украинците сакале да влезат во НАТО. Тие луѓе, исто така, често велат дека НАТО вети дека нема да се прошири на исток, но подоцна го прекрши ова ветување. И ова, наводно, е причината поради која Русија продолжува да ги напаѓа соседите. Ако некогаш сте слушнале луѓе да кажат нешто такво, ве молиме знајте дека тоа не е вистина. И ќе ми требаат помалку од пет минути за да докажам со факти дека и двете изјави се лажни, вели Кулеба на поетокот од обраќањето.

Прво, да ја погледнеме временската линија на настаните. Русија првпат ја нападна Украина во февруари 2014 година со окупирање на полуостровот Крим. Во тој момент, Украина беше неутрална земја по закон и не изрази никаква намера да се приклучи на НАТО. На пример, за време на Револуцијата на достоинството, демонстрантите инсистираа Украина да влезе во ЕУ, а не во НАТО. Дури во есента 2014 година, по многумесечна војна, Украина се откажа од неутралноста.

Значи, што дојде прво, прашува Кулеба? Русија ја напаѓа Украина или Украина сака да влезе во НАТО? Одговорот е јасен. Доколку Русија не го загрози постоењето на Украина, немаше да има причина нашата земја да бара колективна безбедност. Затоа ве молам, не ја повторувајте лагата дека „Русија нападна затоа што Украина сакаше да влезе во НАТО“. Ова не кореспондира со фактите, потенцира шефот на украинската дипломатија

Потоа, тој предлага да се погледне приказната за наводното ветување на НАТО дека нема да се прошири на исток, по што додава дека доколку ги прашате луѓето кои го кажуваат ова, кога точно е дадено такво ветување и кој го дал, повеќето од нив нема да можат да дадат јасен одговор.

Спојлер: затоа што никогаш не било дадено такво ветување и целата приказна е руска бајка, нагласува Кулеба.

Според Кулеба, пософистицираните ќе ви кажат дека ветувањето му било дадено на претседателот на СССР, Михаил Горбачов. Тие дури може да се однесуваат на американско-советските преговори за обединување на Германија од 1990 година. Повторно, да ја разгледаме временската рамка. Во летото 1990 година, кога се одржаа разговорите, советскиот аналог на НАТО, Варшавскиот пакт, сè уште постоеше. Нејзиното распаѓање, а камоли распадот на Советскиот Сојуз, не беше на картата; никој не ни зборуваше за тоа, ниту го замислуваше. Дури следната година, во 1991 година, сосема неочекувано престанаа да постојат Варшавскиот пакт, а подоцна и СССР.

Сега објасни ми како самото прашање би можело да се дискутира во летото 1990 година. Не е чудно што Михаил Горбачов подоцна самиот ја поби оваа лага. На новинарско прашање дали било дадено такво ветување, тој рече дека ова е мит, објаснува украинскиот министер за надворечни работи.

Сега, да го погледнеме од друга перспектива. Како може НАТО воопшто да вети нешто такво, прашува Кулеба?

Првично, објаснува Кулеба, НАТО не одлучува која земја ќе му се придружи. Самите земји треба да го сакаат тоа и всушност, критериумите за членство се многу тешки. Потребна е многу политичка волја и реформи. Сите членки на НАТО кои се приклучија по 1991 година навистина сакаа да бидат дел од него. Нивниот народ го сакаше тоа.

И тука доаѓа најнепријатното прашање за Русија. Зошто сите нации кои беа дел од Советскиот Сојуз или Социјалистичкиот блок беа толку желни и очајни да влезат во НАТО? Па, можеби затоа што за три децении Русија изврши инвазија или поттикна војна во најмалку три нејзини соседи: Молдавија, Грузија и Украина? Во исто време, Русија не се осмели да нападне ниту еден од соседите во НАТО. Ја гледате шемата, прашува Дмитро Кулеба?

Како одговор на прашањата, тој нагласува дека единствената причина за земјите во околината на Русија да бараат членство во НАТО отсекогаш била и останува потребата да го заштитат својот народ од Русија. Затоа, Москва има само самата вина за тоа што сите централноевропски и балтички народи побегнаа од неа и се сокриа под чадорот на НАТО најбрзо што можеа.

Не дозволувајте руските функционери или нивните поддржувачи на Запад да ве измамат. Русија ја нападна Украина не затоа што НАТО „се прошири на исток“ или затоа што Украина „сака да се приклучи на НАТО“. Русија нападна затоа што го негира правото на Украина да постои и сака да ја освои нашата земја и да го убие нашиот народ. Преку нашата заедничка сила можеме и мораме да ја запреме Русија и да ставиме крај на нејзините агресивни планови за остатокот од Европа. За да се случи ова, продолжете да ја поддржувате Украина и не купувајте руски лаги, дециден е Кулеба.

Драган Мишев / Цивил Медиа