За мерката „есенска потрошувачка кошничка“ и за реакциите дека намалувањето на цените на прехранбените производи е минимално, Мицкоски рече дека е подобро да има намалување, отколку зголемување.
– Математички ако гледаме е повеќе од нула, а е подобро да е намалено, отколку да е зголемено, како што беше случајот до пред неколку месеци. Замислете што се случува во овие четири месеци од оваа Влада. Платите повторно растат со истата динамика, како што растеа и претходно со таа разлика што сега Народната банка двапати ја намалува референтната каматна стапка, а инфлацијата се движи на ниво меѓу 2 и 2,5 проценти, нешто што беше мисловна именка за претходната Влада, бидејќи бевме рекордери во инфлација во Европа, имавме инфлација над 20 проценти, рече Мицкоски.
Според него, охрабрувачки индикатор е што имаме раст на платите, а инфлацијата е за десет пати намалена.
– Дали е доволно? Не е, ќе работиме за уште повеќе, следниот месец да биде 1.500, па 2.000 итн, се додека не бидеме сите задоволни, истакна Мицкоски при денешната посета на Општина Аеродром.
Портпаролката на СДСМ, Богданка Кузеска денеска истакна дека „намалувањето на маржите е голема измама на Мицкоски кој ги штити трговците.
По само неколку недели од воведувањето, анализите покажуваат дека владината мерка за намалување на цените на основните производи е целосно неефективна. Голем дел од цените не се намалени, некои се намалени минимално, а за некои производи цените дури и се зголемени, рече Кузеска на денешната прес-конференција.
Оваа мерка, вели Кузеска, се покажа како голема измама на Владата, која очигледно ги штити трговците, а не граѓаните. Според реалните теренски анализи, освен ПР кампањата на Владата со налепници „загарантирана цена“ во маркетите, ништо друго не се променило.
Ј. Ѓ.
