Доколку новоизбраниот американски претседател Доналд Трамп се сврти по ветувањето на „Америка на прво место“, може да се случи изземање на американскиот интерес за Западниот Балкан и фокус на проблемите внатре во земјата, според политичките аналитичари тоа ќе значи понор за македонско-бугарските односи.
– Тоа ќе значи понор за македонско-бугарските односи, и веројатно замрзнат конфликт на долг рок, вели политичкиот аналитичар Благојче Атанасоски.
– Уставните измени, се можни секогаш, доколку се има владина волја за нивно донесување. Тие не се врзани со локалните избори или друг тип на избори. Ако се алудира на тоа дека поради рејтингот се калкулираат уставните измени, дали да бидат пред или после локалните избори, тоа е неодговорна политика, бидејќи станува збор за губење на време и тоа неповратно. На фонот на изјавата од европските челници дека Црна Гора и Албанија можат да станат полноправни членки на ЕУ, ние се уште да губиме години и години во европската чекалница е целосно урушување не само на перспективите на нацијата туку и на самата државност на Републиката, вели тој.
Кандидатката за нова еврокомесарка за проширување Марта Кос од Самитот на Европската политичка заедница задно со лидерите на уште 26 земји од Европа и високи претставници на Унијата и НАТО – нагласи дека очекува Северна Македонија да го промени Уставот како што вети, за да може да продолжи на својот европски пат.
Кос потенцира дека процесот на проширување е маратон, а не спринт и тој мора да остане заснован на принципот на индивидуални заслуги, но дека треба да се работи на постепено интегрирање на земјите кандидати во клучните сектори, пред се на заедничкиот пазар.
– Сакам да видам конкретни резултати во процесот на пристапување на земјите од Западниот алкан. Да ја претвориме оваа можност во реалност за Западниот Балкан. Помирувањето и регионална соработка се клучни елементи на процесот на проширување на Западниот Балкан. Ако го потврдите мојот избор повеќе ќе се вклучам во надминувањето на билатералните проблеми и изнаоѓањето решенија. Тие не смеат да останат трајни пречки на патот кон Брисел, порача Кос.
Рама, кој ќе биде домаќин на следниот Самит на Европската политичка заедница, оцени дека победата на Трамп во САД не треба да предизвикува загриженост и дека европските лидери треба да размислуваат и да направат многу повеќе за да се обезбеди посилна Европа.
– Сметам дека се крена многу врева, можеби не на вистински начин, за неговото можно враќање. Искуството ми кажува дека кога тој беше претседател и сите велеа дека НАТО ќе стане послаб, НАТО стана посилен. Па да видиме и да не се хистеризираме пред да ја видиме реалноста. Мислам дека ова не мора да биде лошо за Европа, може да биде подобро за Европа. Неговиот избор може да биде одлична можност за Европа, заклучи Рама.
Дестан Јонузи
