На конференцијата на ОН за климатски промени (КОП29) во Азербејџан во рано изутринава учесниците постигнаа договор за обезбедување 300 милијарди долари годишно за посиромашните земји за да им се помогне во справувањето со климатските промени.
Покрај ветувањето од 300 милијарди долари, нациите се согласија дека се потребни 1,3 трилиони долари до 2035 година за да се помогне и во спречување на климатските промени.
Неколку земји во развој кои припаѓаат на Глобалниот југ и еколошки активисти го осудија договорот постигнат на самитот, но тој беше пофален од САД, Германија и други, јави ДПА.
КОП29 требаше да заврши завчера, но се одолговлекуваше подолго од очекуваното бидејќи преговарачите не се согласуваа бидејќи бараа консензус за финансирање за борба против климатските промени во следната деценија.
Во еден момент, делегатите од најмалку развиените држави и малите островски нации ги напуштија дискусиите во знак на протест против финансискиот договор што се подготвуваше.
Конференцијата за климата ја допре централната тема за финансиската одговорност на индустријализираните земји, кои историски користеле повеќе фосилни горива, што доведува до емисии на стакленички гасови.
Конференцијата, исто така, ги истакна разликите меѓу богатите влади, кои се ограничени од тесните буџети дома, и земјите во развој, кои мора да се справат со последиците од бурите, поплавите и сушата.
Бајден го нарече договорот „историски“
Американскиот претседател Џо Бајден го нарече „историски“ договорот за финансирање на сиромашните земји во борбата против климатските промени.
„Никој не може да го запре преминот кон чиста енергија која моментално се одвива во САД“, рече Бајден.
Во соопштението на американскиот претседател, објавено денеска, се вели дека договорот постигнат во Баку поставува амбициозна цел во сферата на финансирање на борбата против климатските промени.
Бајден истакна дека договорот ќе помогне да се мобилизираат финансиите на различни нивоа и да се создаде пазар за американските електрични автомобили и други производи.
Алудирајќи на новоизбраниот американски претседател Доналд Трамп, кој вети дека ќе го зголеми производството на нафта откако ќе ја преземе функцијата на 20 јануари, Бајден рече дека „додека некои се обидуваат да ја негираат или да ја забават револуцијата на чиста енергија што се случува во Америка и во светот, никој не може да ја спречи“.
