Ливерпул е многу блиску до продолжување на договорот со Мохамед Салах кој истекува следното лето, пренесуваат англиските медиуми.
Иако пред неколку дена се чинеше дека 32-годишниот незадоволен напаѓач ќе го напушти „Енфилд“ на крајот од сезоната, за што зборуваше и египетскиот репрезентативец, сега е многу извесно дека тој ќе остане во клубот чиј дрес го носи од 2017 година.
Менаџерот на искусниот фудбалер инсистираше на тригодишна соработка, додека Ливерпул првично понуди едногодишен договор. Сепак, како резултат на преговорите, страните постигнаа компромис и нов двегодишен договор.
Медиумите од Островот пренесуваат дека финансиите никогаш не биле проблем во преговорите со Салах бидејќи тој веќе е еден од најплатените играчи во клубот со плата од 400.000 фунти неделно.
Салах дојде на „Енфилд“ од Рома, одигра вкупно 377 натпревари и постигна 226 гола со 101 асистенција.
Египќанецот е најдобар стрелец во Премиер лигата оваа сезона со 13 постигнати голови, а „црвените“ се лидери со 35 бода.
