Полицијата синоќа повикала на разговор во полициска станица новинарски екипи од ТВ21 и Ројтерс, поради како што велат од МНЕ, немање соодветна дозвола за снимање со дрон на собирите на плоштадот во Скопје, по повод трагедијата во Кочани.
Како што информираа од Министерството за внатрешни работи за МИА, тие по разговорот се пуштени.
Неколку илјади граѓани на Јавниот собир на повик на иницијативата „Кој е следен?“, вчера на плоштадот Македонија во Скопје оддадоа почит и побараат одговорност и правда за настраданите во страшната трагедија во Кочани.
Собирот кој траеше повеќе од еден час, започна со 16 минутен молк. Создавајќи ѕвездено небо присутните изразија сочувство и заедништво.
Собирот помина мирно и достоинствено. Тишината провејуваше за цело време на собирот. Молкот зборуваше за достоинството и почитта на граѓаните за настраданите.
Од МВР информираа и дека Агенцијата за цивилно воздухопловство (АЦВ) вовела забрана за користење воздухоплови без екипаж (дронови), за вршење какви било операции, на територијата на градовите Кочани и Штип.
Министерството за внатрешни работи ја пренесува објавата на АЦВ дека „неовластеното, некоординирано оперирање на овие воздухоплови не само што го загрозува воздушниот сообраќај, туку може да предизвика сериозни последици по животот и имотот на трети лица на земја“ и укажувањето дека „оперирање со воздухоплови без екипаж во забранети зони е основ за поведување постапка за санкционирање согласно Законот за воздухопловство“.
-Апелираме до граѓаните во овие денови на неизмерна тага и болка во рамки на загарантираното со Устав право на собирање и одржување на протест, тие да се одржат во мирна атмосфера, да се почитуваат веќе донесените одлуки од страна на државните институции и да се почитуваат наредбите и насоките од страна на полициските службеници, во насока на обезбедување на мирот, безбедноста и сигурноста на сите граѓани во државата, наведува МВР.
Прочитајте и:
(ФОТО) Мирно и достоинствено граѓаните на Скопје оддадоа почит за настраданите во Кочани
