„Состојбата на медиумите во Македонија е комплексна и исполнета со предизвици, иако постојат и позитивни поместувања во одредени области. Иако има делумна слобода на изразување, новинарите не ретко се соочуваат со притисоци, а многу пати се забележува и автоцензура“, вели во разговор за Фронтлајн, новинарката Елизабета Дамјаноска Спасеновска, по повод Светскиот ден на слободата на медиумите.
ФРОНТЛАЈН: Како би ја опишале состојбата на медиумите во нашата земја?
Елизабета Дамјаноска Спасеновска: Состојбата на медиумите во Македонија е комплексна и исполнета со предизвици, иако постојат и позитивни поместувања во одредени области. Иако има делумна слобода на изразување, новинарите не ретко се соочуваат со притисоци, а многу пати се забележува и автоцензура.
Исто така, ретко се забележува разновидност на мислења, (понекогаш дури насловите на вестите се исти), иако во Македонија има голем број медиуми, особено он лајн портали. Од друга страна, би сакала да нагласам дека на македонскиот медиумски простор има професионални медиуми и новинари, но поради динамиката на работа, често се изоставува темелното информирање.
ФРОНТЛАЈН: Како го оценувате нивото на медиумските слободи и слободата на изразување?
Елизабета Дамјаноска Спасеновска: Кога станува збор за слободата на изразување, особено сум загрижена за безбедноста на новинарите, која се нарушува преку онлајн закани, притисоци и дискредитации.
ФРОНТЛАЈН: Кои се вашите препораки за унапредување на медиумите и зајакнување на медиумските слободи?
Елизабета Дамјаноска Спасеновска: За унапредување на медиумите и зајакнување на медиумските слободи во Македонија, потребен е сеопфатен пристап, кое ќе вклучи поддршка за истражувачко новинарство, обуки и менторски програми за новинари со што би се зголемил професионалниот и етичкиот стандард. Исто така, сметам дека неопходно е воведување програми за медиумска писменост во образовнниот систем со цел да се поттикне критичко размислување кај младите.
За крај, неопходно е брзо и ефикасно постапување при закани или напад на новинари. Од друга страна, и дел од новинарите неопходно е да го зголемат професионализмот, да прават двојна проверка пред објава на вест, и помалку да употребуваат клик-бејт наслови.
Дестан Јонузи
