Заменик министерот за здравство, Јовица Андовски утрово потврди за МИА, дека денеска ќе го потпише решението за формирање комисија за стручен надзор при МЗ, во врска со детето од Кавадарци кое почина пред неколку дена.
– Докторите се повикани за веднаш да почнат со работа, подвлече Андовски.
Во петокот, од Државниот санитарен и здравствен инспекторат рекоа за МИА дека при инспекциските надзори, не се констатирани недостатоци од надлежност на ДСЗИ, во врска со починатото тригодишно дете.
Притоа, појаснија дека биле извршени вонредни инспекциски надзори во три здравствени установи, со цел да се следи патот на лекување на детето. Извршени биле надзори во ПЗУ Ординација по општа медицина Целзус Нова во Кавадарци, во ЈЗУ Општа болница со проширена дејност – Кавадарци и во ЈЗУ УК за детски болести – Скопје.
Оттаму потсетија дека директорот на ЈЗУ Општа болница со проширена дејност – Кавадарци, формирал Комисија во состав од тројца доктори, за утврдување на материјална одговорност на здравствени работници кои учествувале во лекувањето на пациентот. Во тек било изготвување на извештај.
Претходно, родителите на детето во изјава за МИА, ги повикаа надлежните во државата да испитаат можна лекарска грешка во врска со овој случај.
Како што соопштија тогаш од полицијата, тригодишното дете било починато донесено на комплексот клиники „Мајка Тереза” во Скопје.
