Генералниот секретар на НАТО, Марк Руте, денеска изјави дека е „клучно да се работи на деескалација“ по израелските напади утрово врз воени и нуклеарни цели во Иран.
-Ова е очигледно брзо развивачка ситуација и ова е еднострана акција од страна на Израел, рече Руте за време на состанокот со шведскиот премиер Улф Кристерсон.
„Сега е клучно за голем број сојузници, вклучувајќи ги и САД, да работат на деескалација“, додаде тој.
Руте рече дека знае дека го прават тоа и оти тоа сега е „апсолутен приоритет“.
Израел денеска изврши серија воздушни напади врз Иран, таргетирајќи околу стотина цели, вклучувајќи нуклеарни постројки. Ирански воени команданти и нуклеарни експерти беа убиени во израелските напади.
Техеран возврати со лансирање дронови на израелска територија.
Шведскиот премиер рече дека она што се случува во нестабилниот регион ризикува значително да ја влоши ситуацијата.
Кристерсон рече дека постои широк консензус дека на Иран не може да му се дозволи да развива нуклеарно оружје, но додаде дека прашањето треба да се врати на преговарачката маса.
Тој рече дека нападите „би можеле да ги зголемат ризиците од терористички закани и други опасни активности“.
