Мигрантите, вкупно 247 лица, кои од либиското крајбрежје нелегално пристигнале во Грција се уапсени и префрлени во центри за притвор, информираше министерот за миграција и азил Танос Плеврис, мерка што се спроведува откако грчката Влада одлучи да ги замрзне барањата за азил доставени од барателите од северна Африка, јави дописничката на МИА од Атина.
Плеврис преку платформата Икс информираше дека во тесна соработка со крајбрежната служба и полицијата, структурите на Министерството за миграција ги претвораат во затворени центри за притвор, каде што мигрантите ќе бидат притворени сѐ до нивното враќање назад.
– Пораката е јасна: не ги прифаќаме нивните барања за азил, ги апсиме, ги сместуваме во притвор во затворени структури, го започнуваме процесот на нивно враќање, напиша Плеврис.
Пред десет дена, грчкиот Парламент го изгласа амандманот што предвидува во следните три месеци да биде суспендирано поднесувањето барања за азил од лица од северна Африка, кои нелегално влегле во Грција со пловно средства, а без регистрација, ќе се враќаат или во земјата од која дошле или во земјата на потекло.
За конкретниот амандман, грчкиот премиер Кирјакос Мицотакис тогаш во изјава за германскиот весник „Билд“ истакна дека нивната порака е дека „Грција не е отворен коридор кон Европа“, изрази подготвеност тесно да соработуваат со либиските власти за да се спречат поаѓањата од Либија, но и додаде дека е потребен „унифициран европски одговор“.
