ВМРО-ДПМНЕ и Христијан Мицкоски свесно ги туркаат граѓаните во сиромаштија, додека инфлацијата руши рекорди, а платите стагнираат, истакна претседателот на Социјалдемократскиот сојуз на Македонија, Венко Филипче.
– Пред еден од најтешките месеци во годината, граѓаните се соочени со суровата економска реалност – сè е поскапено, а платите стагнираат. Ја прекинаа спиралата на раст на платите што ја започна СДСМ. Инфлацијата од 4,8% секој месец го јаде животниот стандард – граѓаните живеат полошо. Синдикалната потрошувачка кошничка за август изнесува над 65.000 денари, а дури и две минимални плати не се доволни за преживување на месецот, нагласи Филипче.
Тој додаде дека фактите говорат сами за себе: растот на реалната плата, онаа што ја мери куповната моќ на граѓаните, во јуни изнесувал само 3,8%, за разлика од минатата година кога со економските политики на СДСМ тој изнесувал 11%.
– За прв пат по долго време имаме пад на просечната плата во споредба со претходниот месец. Ова е аларм кој не смее да се игнорира, предупреди тој.
Филипче ја нагласи и разликата во пристапот кон граѓаните: „СДСМ знае како да ја врати стабилноста и достоинството на граѓаните. Нема да отстапиме од барањата за покачување на платите во сите сектори, зголемување на минималната плата на 500 евра и укинување на ДДВ за основните прехранбени производи. Битката за повисоки приходи е битка за достоинствен живот.“
Во вакви услови, предупредува Филипче, државата се претвора во земја на сиромаштија и неизвесност.
– СДСМ нуди јасен план – повисоки плати, намалување на цените и стабилност на економијата. Сè друго значи продолжување на агонијата, порача тој.
Протести и барања за поголеми плати
Од почетокот на годинава до денес во земјава се одржани дури 14 протести и два штрајка со барање за зголемување на платите. Тоа покажува дека работниците не се подготвени да молчат и сè поактивно излегуваат на улица за да се изборaт за подобар животен стандард. Според последните иницијативи, очекувањата се дека уште веднаш може да се донесат измени и дополнувања на законот за минимална плата, кои би стапиле на сила по локалните избори. Со тоа би се овозможило зголемувањето на минималната плата да се примени и ретроактивно.
Синдикална кошничка и реалноста на граѓаните
Според пресметките, синдикалната минимална кошничка за август изнесува над 65.000 денари. Дури и со две минимални плати, просечно семејство не може да ги покрие основните животни трошоци. Сè поголем дел од приходите на домаќинствата одат на храна и сметки, а за образование, култура и заштеда останува речиси ништо.
Економска состојба
Македонската економија се соочува со сериозни предизвици. Инфлацијата од 4,8% ја јаде секоја добивка, а просечната плата не може да ги следи реалните трошоци на живот. Економистите предупредуваат дека продолжувањето на ваквиот тренд ќе ја продлабочи кризата и ќе ја зголеми емиграцијата, особено кај младите.
Во многу сектори, вклучително и здравството и образованието, платите стагнираат, а работниците предупредуваат дека ако состојбата не се промени, ќе следуваат нови протести и радикални синдикални активности.
Дестан Јонузи
