Поранешната градоначалничка на Скопје, Данела Арсовска, му упати јавна порака на актуелниот градоначалник Орце Ѓорѓиевски, обвинувајќи го за, како што вели, „лажни тврдења“ за долговите на Градот и бројот на вработени.
„Кога се лаже, се држат рачињата во формација извежбана од медот“, напиша Арсовска во својата објава, додавајќи дека градоначалникот треба јавно да ги објави сите фирми со долг, заедно со фактурите и датумите, „за да знае народ дека лажеш“.
Арсовска побара и објава со имиња и презимиња на сите 500 вработени, со податок кој од кога не доаѓал на работа, за – како што тврди – „да се види дека лажеш“.
„Три години за корка леб сите кои одеа на работа ти ги избрка, за да направиш место за своите партиски војници“, напиша таа.
Во продолжение, Арсовска му порача на Ѓорѓиевски да не се крие зад партиски соопштенија и „ботови“:
„Нека не ти пишува Луке соопштенија за да се пресметуваш, ниту твоите полусветови ботовски да ме навредуваат, бидејќи знае народ дека лажеш.“
На крајот, поранешната градоначалничка го повика Ѓорѓиевски на јавна телевизиска дебата:
„Ако сакаш како МАЖ да соочиш аргументи, ајде на дебата на ваш медиум по избор, па ќе си раскажеш таму и за долг и за вработени во Скопје и во Кисела Вода, каде што има кој да ти врати со факти наспроти твоето лажење.“
Објавата предизвика големо внимание и реакции на социјалните мрежи, особено поради нејзиниот директен тон и повик за јавно соочување.
Синоќа градоначалникот на Скопје Орце Ѓорѓиевски изјави дека „над 300 милиони евра е вкупниот долг на ЈП во Скпје и до денес се над 500 отпуштени кои не доаѓале на работа“.
„Над 300 милиони евра е, според нашите пресметки, вкупниот долг на јавните претпријатија на Скопје, а не како што очекував околу 200 милиони. Ќе треба посериозен ангажман, но тоа е дополнителен предизвик и мотив во намерата да изградиме метропола со која сите ќе се гордееме за кратко време, изјави Ѓорѓиевски.
Во интервју за ТВ Сител тој кажа дека состојбата не го плаши. Како што рече, „ќе биде пеколно тешко, но имам одличен тим и очекувам силна поддршка од Владата и со добра организација и домаќински ќе ја надминеме состојбата“.
Колку поблиску до правдата, толку повеќе Данела Арсовска ќе е бучна и нервозна, соопшти денеска ВМРО-ДПМНЕ, како реакција на нејзина објава.
-Ѝ посакуваме да се надмине себеси и да ги победи своите стравови и болки. Борбата со таквите демони не е лесна, и ѝ посакуваме среќа. Исто како и со соочувањето со правдата за хаосот што го остави зад себе, кој е неодминлив процес, порача ВМРО-ДПМНЕ.
Ј. Ѓ.
