Денеска на Disney+ каналот премиерно ќе биде прикажана деветтата епизода од култната документарна серија „Антологија на Битлси“, снимена три децении по оригиналниот проект. Новото издание, според сценариото и режијата на Оливер Мари, се фокусира на влијанието што заедничкото творење го оставило врз членовите на групата во годините по распадот.
Оригиналната серија беше емитувана во 1995 година во осум продолженија и ги опфати раните денови во Ливерпул и Хамбург, подемот до светска слава, појавата на битлманијата и драматичниот крај на групата во 1970 година, пренесува Reuters. Проектот тогаш ја вклучи и приказната за создавањето на синглот „Free as a Bird“, реконструиран од демо снимка што Џон Ленон ја направи во 1977 година, само три години пред неговото убиство.
Новата, деветта епизода носи досега необјавени снимки со Пол Макартни, Џорџ Харисон и Ринго Стар од деведесеттите години. Мари вели дека епизодата е намерно изолирана од хронолошкиот тек на првите осум делови и функционира како „поглед наназад“ кој открива како поранешните членови го доживувале наследството на Битлси, како се сеќавале на творечкиот процес и како повторното соработување во 1990-тите им влијаело емотивно и музички.
