Шеснаесетгодишниот Џеред Лепора од Бристол стана мало инженерско чудо на јавната сцена откако дизајнираше и изгради целосно функционална роботска рака користејќи само Лего коцки. Проектот, на кој работел речиси две години, привлече внимание на меѓународните академски кругови и го донесе најмладиот говорник на престижната конференција IROS 2025 во Хангжу, Кина, пишува Би-Би-Си.
Џеред не работел сам. Неговиот татко, проф. Нејтан Лепора – експерт за напредни роботски раце на Универзитетот во Бристол – му бил ментор и соработник. Но идејата, како што вели тинејџерот, била целосно негова.
„Татко ми прави напредни роботски раце и тоа секогаш ми било неверојатно. Па си реков: зошто да не направам една од Лего?“, објаснува Џеред.
Иако е направена од нешто што најчесто се поврзува со игра, раката е сериозно инженерско дело. Работи со два мотори, управувани преку тензионски тетиви, и има четири прста, секој со три зглобови. Механизмот е базиран на Лего clutch gears, кои овозможуваат прстите да се движат синхронизирано и да запрат токму кога го допираат предметот – однесување многу блиско до човечката рака.
Тестираната верзија може да подигне различни предмети – овошје, чаши и други мали објекти – што ја прави функционална за вистински роботски задачи. Џеред и Нејтан заедно напишале и научна статија за проектот, што дополнително го внесе младиот иноватор во светот на академската роботика.
