Франција го блокираше затворањето на две преговарачки поглавја во пристапните преговори на Црна Гора со Европската унија, но, и покрај тоа, се очекува Подгорица следната недела да затвори три поглавја, потврдуваат дипломатски извори по состанокот на постојаните претставници на земјите членки на ЕУ во Брисел.
Според информации на ТВЦГ, Црна Гора би требало да ги затвори поглавјата Право на основање претпријатија и слобода на обезбедување услуги (Поглавје 3), Слободно движење на капиталот (Поглавје 4) и Право на трговски друштва (Поглавје 6). Меѓувладината конференција е закажана за 16 декември, непосредно пред почетокот на седницата на Советот на министри за општи работи на Европската унија.
Од друга страна, отворени ќе останат поглавјата Земјоделство и рурален развој (Поглавје 11) и Рибарство (Поглавје 13), на чие затворање се спротивставила Франција, поради што тие не се затворени ниту по последниот круг консултации.
Дипломатски извори наведуваат дека постојаните претставници на земјите членки повторно ќе се состанат во текот на викендот, што би можело да претставува дополнителна можност за разговори околу евентуално затворање и на други поглавја пред одржувањето на меѓувладината конференција.
Црна Гора официјално ги започна преговорите за членство во Европската унија на 29 јуни 2012 година, откако во 2010 година доби кандидатски статус. Досега ги има отворено сите преговарачки поглавја, а неколку од нив се и привремено затворени, што ја позиционира како најнапредната земја од Западен Балкан во процесот на европска интеграција.
