Опозициската СДСМ денеска побара јасни одговори од ВМРО-ДПМНЕ за, како што наведуваат, сомнителната поврзаност меѓу фирма што во краток период добила високи суми од државни тендери и поранешниот функционер Миле Јанакиески.
„Фирма со само тројца вработени добила 1,2 милиони евра од тендери во период од само два месеца. Ова е фактот од кој ВМРО-ДПМНЕ не може да избега“, порачаа од СДСМ.
Од партијата тврдат дека ВМРО-ДПМНЕ повторно ја доведува јавноста во заблуда со обид да ја пренасочи темата кон друга фирма.
„Фирмата што денеска ја објавивме во новата бомба е основана на 8 јуни 2023 година. Тоа е проверлив податок и за тоа постои документ“, наведуваат од СДСМ.
Во реакцијата се посочува дека фирмата која ВМРО-ДПМНЕ ја споменува во своите одговори, всушност, нема врска со актуелните обвинувања.
„Втората фирма за која говори ВМРО-ДПМНЕ е стара фирма на студентот на Мицкоски. Наместо да манипулираат со податоци за заработени две илјади евра во минатото, нека кажат каква е поврзаноста на фирмата од бомбата со сопругата на Миле Јанакиески“, потенцираат од СДСМ.
Според опозициската партија, клучниот период за растот на фирмата поврзана со студентот на лидерот на ВМРО-ДПМНЕ е од јуни 2024 до август 2025 година.
„Во тој период фирмата заработила околу 25 милиони денари од тендери. Тоа е суштинското прашање“, наведуваат од СДСМ.
Од партијата дополнително прашуваат како е можно, во областа на информатичките технологии, токму оваа фирма да биде единствениот субјект што добил договор вреден 1,2 милиони евра за, како што велат, ‘напредна заштита’ на Владата.
„Ова не е прашање за ИТ-експертиза, туку прашање за пари и бизниси. АКТ знае сè. Работата не е завршена и сите ќе одговараат“, порачуваат од СДСМ.
Претходно Владата ги отфрли како целосно неосновани и неточни обвинувањата што денеска ги изнесе СДСМ на прес-конференција, оценувајќи дека станува збор за груба клевета и свесна политичка конструкција без фактичка основа.
