Михаела Бентхаус, 33-годишна германска инженерка за аеронаутика и мехатроника во Европската вселенска агенција (ESA), стана првата личност во инвалидска количка што отпатувала во вселената, откако го премина т.н. Карманов праг – границата што се смета за почеток на вселената, на височина од 100 километри над морското ниво, објави CNN.
Историскиот лет беше изведен во саботата наутро со ракетата New Shepard на компанијата Blue Origin, која полета од лансирниот комплекс во близина на Ван Хорн, Тексас. Мисијата, означена како NS-37, е 16-та суборбитална туристичка мисија на компанијата основана од Џеф Безос, чија цел е проширување на пристапот до вселената и надвор од традиционалниот профил на астронаути.
„Секогаш сакав да одам во вселената, но никогаш не мислев дека тоа навистина може да ми се случи“, изјави Бентхаус за CNN пред летот.
Таа признава дека долго време се прашувала дали нејзиниот инвалидитет претставува непремостлива пречка. „Мислев – можеби вселената е за луѓе со ампутирана нога кои сепак можат да одат, но повреда на ’рбетниот мозок можеби е премногу“, раскажа таа.
Бентхаус е страствена авантуристка, која во 2018 година доживеала тешка повреда на ’рбетниот мозок при планински велосипедизам. По несреќата, таа ја насочила својата енергија кон инженерството и истражувањето, фокусирајќи се на предизвици што може да ги совлада користејќи инвалидска количка.
Летот со New Shepard траеше околу десет минути. Ракетата ги забрза патниците на повеќе од трипати поголема брзина од звукот, носејќи ја капсулата над Кармановата линија, каде што екипажот доби неколку минути бестежинска состојба.
Во интервју за CNN, Бентхаус откри дека планирала да користи специјален ремен за да ги стабилизира нозете додека се одврзува од седиштето и ја доживува микрогравитацијата, како и погледот кон Земјата од вселената.
Иако веќе имала искуство со микрогравитација за време на параболичен лет со авион, таа вели дека овојпат нејзиниот фокус бил повеќе на панорамскиот поглед, отколку на движењето низ кабината.
Бентхаус истакнува дека нејзиното искуство нема да заврши со овој лет – таа има намера да го искористи стекнатото знаење за да помогне во подобрување на условите и пристапноста за идни вселенски патници со слични физички предизвици.
Редакција Фронтлајн
