Емоционалната исцрпеност не изгледа исто кај сите. Некој станува тивок, некој нервозен, некој исчезнува без објаснување, а некој продолжува да функционира како ништо да не се случува – сè додека не пукне. Астрологијата не нè оправдува, но ни помага да разбереме зошто секој знак има свој начин да се брани кога внатрешно останува без енергија.
Ова не е приказна за слабост, туку за начинот на преживување.
Овен – кога е емоционално исцрпен, ја губи трпеливоста. Наместо директноста по која е познат, се појавува раздразливост или нагла дистанца. Овенот не знае како да мирува со заморот – или ќе избувне, или ќе се повлече за да не се повреди. Исцрпеноста кај овој знак често доаѓа од чувството дека со сè мора да се носи сам.
Бик – се повлекува во рутина. Кога нема сила за емоции, Бикот се држи за познатото – храна, простор, навики, тишина. Надворешно изгледа стабилно, но внатрешно се затвора. Исцрпеноста се појавува кога премногу долго се трпи и кога сигурноста е разнишана.
Близнаци – исчезнуваат. Кога умот е преоптоварен, комуникацијата запира. Од зборливи, стануваат недостапни. Исцрпеноста кај Близнаците доаѓа од премногу информации, разговори и очекувања. Потребна им е пауза од луѓе, не затоа што не им значат, туку затоа што умот им бара тишина.
Рак – се затвора во својот внатрешен свет. Кога емоционалната батерија е празна, Ракот станува повлечен и чувствителен. Понекогаш изгледа како да се дистанцира, но всушност се штити. Исцрпеноста доаѓа од премногу грижа за другите и од носење туѓи емоции како свои.
Лав – продолжува да глуми сила. Дури и кога е исцрпен, Лавот се труди да не покаже слабост. Насмевката останува, но зад неа се крие замор од постојано докажување. Исцрпеноста кај Лавот доаѓа кога чувството дека е ценет и виден изостанува.
Девица – се свртува кон самокритика. Кога емоционално нема сила, Девицата почнува да анализира што погрешила. Исцрпеноста се појавува од перфекционизмот и од чувството дека никогаш не е доволно. Наместо одмор, умот работи уште посилно.
Вага – молчи за да не наруши мир. Кога е исцрпена, Вагата се повлекува емоционално, но не кажува зошто. Се труди сè да изгледа во ред, дури и кога не е. Заморот доаѓа од постојано балансирање и ставање на другите пред себеси.
Скорпија – сече. Кога емоционалната исцрпеност ќе се наталожи, Скорпијата може нагло да ги прекине контактите. Не од ладнокрвност, туку од потреба за заштита. Исцрпеноста се раѓа од длабоките врски и од постојаното емоционално нуркање.
Стрелец – бега. Кога нема сила да се соочи со внатрешниот замор, Стрелецот бара простор, патување, промена. Исцрпеноста доаѓа кога слободата е ограничена или кога животот станува премногу тежок и сериозен.
Јарец – издржува до крај. Исцрпеноста кај Јарецот често не се забележува веднаш, бидејќи продолжува да функционира. Но кога ќе се појави, доаѓа како тежина што тешко се трга. Заморот е резултат на постојаната одговорност и самоконтрола.
Водолија се дистанцира ментално. Кога емоциите стануваат премногу, Водолијата се повлекува во рационалност. Исцрпеноста доаѓа од чувството дека не е разбрана или дека мора постојано да објаснува.
Риби – се губат во внатрешниот свет. Кога се исцрпени, Рибите бараат бегство – во соништа, музика, тишина. Заморот доаѓа од премногу емпатија и впивање на туѓите чувства.
Анаис
