Украина остро ги демантира руските тврдења дека нејзини сили извршиле напад со дронови врз една од резиденциите на рускиот претседател Владимир Путин, оценувајќи ги како целосна измислица насочена кон поткопување на мировните преговори. Украинскиот претседател Володимир Зеленски изјави дека Москва свесно пласира лажни информации за да оправда нови напади врз украински градови и да создаде изговор за заострување на својата преговарачка позиција.
Русија тврди дека украински дронови ја нападнале претседателската резиденција во Новгородската област, наводно со дури 91 дрон со долг дострел. За овие обвинувања не е приложен никаков доказ. Украинската страна ги нарече „типични руски лаги“, со цел да се оправда продолжување на агресијата и одбивањето на Москва да преземе реални чекори кон прекин на војната.
САД се сомнева во руската приказна за нападот врз резиденцијата на Путин, бараат разузнавачки докази
Сомнеж во руската верзија изразија и Соединетите Американски Држави. Американскиот амбасадор во НАТО, Метју Витакер, изјави дека не е јасно дали инцидентот воопшто се случил и дека ќе се потпира исклучиво на проценките на американските и сојузничките разузнавачки служби. Тој оцени дека би било „непромислено“ Украина, која инсистира на мировен договор, да преземе чекор што би можел да се протолкува како ескалација во чувствителен момент од преговорите.
Белата куќа и американската разузнавачка заедница засега одбија официјален коментар за наводниот напад.
Американскиот претседател Доналд Трамп, по телефонски разговор со Путин, изјави дека бил информиран за наводниот инцидент и дека информацијата го „разгневила“, но призна дека сè уште нема потврда за тоа што навистина се случило.
Зеленски остро кон Индија и Обединетите Арапски Емирати
Зеленски упати и остра критика кон Индија, Обединетите Арапски Емирати и други држави кои ги осудија наводните украински напади, а притоа молчат за континуираните руски бомбардирања на украински градови, пренесува Кијив Индипендент.
„Збунувачки и неприфатливо е што некои земји осудуваат настан кој воопшто не се случил, додека со месеци молчат за убиствата на цивили и бомбардирањето на нашите деца“, изјави Зеленски на онлајн прес-конференција со украински новинари.
Министерството за надворешни работи на Обединетите Арапски Емирати претходно објави соопштение во кое го осуди „гнасниот напад“, иако земјата нема понудено докази, а во исто време одржува блиски економски и политички врски со Русија. Индија, пак, повика на воздржаност од двете страни, без директно да ја осуди руската агресија.
Дипломатски напори и застој во преговорите
Во услови на зголемени тензии, Кијив најави серија средби на високо ниво со САД и европските сојузници на почетокот на новата година, во обид да се задржи преговарачкиот процес. Според аналитичарите, ваквите руски обвинувања имаат јасна цел – да се саботира секоја можност за дипломатски напредок.
„Целта на Москва е да го наруши секој обид за договор. Путин нема вистинска намера да ја заврши војната преку преговори“, оценува рускиот колумнист Сергеј Пархоменко.
Редакција Фронтлајн
