Познатата актерка Џенифер Лоренс откри дека снимањето интимни сцени ѝ е полесно со актери кои не ги познава добро, отколку со блиски пријатели. Во неодамнешно интервју, Лоренс отворено зборуваше за своите искуства и за еден од најпредизвикувачките аспекти на актерската професија.
Интимните сцени одамна се тема на дебата во филмската индустрија, каде ставовите за тоа што е прифатливо значително се разликуваат. Во последните години, токму поради ваквите предизвици, на сетовите се појавија и координатори за интимност – професионалци чија улога е да обезбедат јасно поставени граници и чувство на сигурност за актерите за време на ваквите сцени.
„Помалку е непријатно со странец“
Лоренс, која зад себе има неколку улоги со поексплицитни сцени, вели дека ваквите моменти се полесни кога партнерот е некој што не го познава приватно. Таа го наведе искуството со Роберт Патинсон, со кого соработувала на филмот Die My Love.
„Всушност беше полесно, затоа што јас и Роб не се познававме. Некако е подобро така, знаете?“, изјави Лоренс, додавајќи дека работата со странец ѝ создава помала непријатност во такви ситуации.
Актерката се присети и на необичниот прв ден од снимањето на филмот, кога, според неа, сцените биле исклучително интензивни уште од самиот почеток. „Тоа беше како двајца актери кои се напаѓаат како тигри. Потоа ни рекоа: ‘Може ли тоа да го направите голи?’ И тоа беше првиот ден на сетот“, раскажа таа со доза хумор.
„Почудно е со пријатели“
Од друга страна, Лоренс признава дека снимањето интимна сцена со близок пријател ѝ било многу понепријатно. Таа го спомна искуството со Џош Хачерсон, нејзин колега од филмската франшиза The Hunger Games, со кого имаат долгогодишно пријателство. „Токму затоа беше почудно – затоа што сме добри пријатели“, објасни таа.
Актерката додаде и дека често чувствува анксиозност пред почетокот на нов проект, па ѝ помага ако најтешките сцени ги сними уште на самиот старт, за побрзо да се ослободи од психолошкиот товар.
