Претседателот на Сојузот на синдикатите на Македонија, Слободан Трендафилов, денеска на прес-конференција најави блокади на улиците пред Собранието, како реакција на, како што рече, едногодишното одложување на Законот за минимална плата и игнорирањето на синдикалните барања.
„Утре, со почеток од 9:00 часот, улиците ‘Даме Груев’ и ‘11 Октомври’, пред Собранието, ќе бидат блокирани од работниците. Согласно законот, минимално 21 човек ни се потребни на двете локации, односно по 21 човек, за да ги блокираме пратениците“, изјави Трендафилов.
Тој нагласи дека блокадата има за цел да испрати јасна порака до пратениците, кои, според него, повеќе од една година го кочат носењето на законското решение за минималната плата.
„Тие го блокираат Законот за минимална плата повеќе од една година, а за истиот период секое семејство е посиромашно за 9.500 денари месечно, затоа што вредноста на синдикалната минимална кошница е зголемена за толку пари“, рече претседателот на ССМ.
Трендафилов оцени дека пратениците „се прават глуви и слепи“ на иницијативата за зголемување на минималната плата, како и на барањето за раст на останатите работнички плати.
„Се прават глуви и слепи на иницијативата на Сојузот на синдикатите на Македонија за зголемување на минималната плата и за зголемување на останатите работнички плати за најмалку 6.000 денари“, нагласи тој.
Во исто време, Трендафилов ја повтори иницијативата за намалување на платите на пратениците.
„Бараме намалување на нивните плати за 80%, односно основицата за пресметка на платите да се намали од просечна на минимална плата, за и тие да дојдат на минималец, па потоа да зборуваат колку е добра минималната плата и како се живее во Македонија“, изјави тој.
Според него, ваквата иницијатива е уставна и законска, а јавноста заслужува одговор зошто едни намалувања се прифатливи, а други не.
„Како ќе биде уставно и законски да се намалат коефициентите за сложеност на нивните плати за 9,2%, а да не се намалат за 80%? Како 9% ќе биде уставно и законски, а 80% e неуставно и незаконски?“, праша Трендафилов.
Тој најави дека пратениците први ќе се соочат со блокадите, по што ќе следуваат и други чекори.
„Пратениците први ќе се соочат со гневот на работниците. Тие нема да можат да наплатат трошоци за доаѓање на работа, кои изнесуваат од 100 па нагоре евра. Со тоа ќе им покажеме дека, како што работниците доаѓаат на работа пеш, со автобус или со јавен превоз, така ќе треба и тие истиот ден да дојдат, за да им покажат на работниците дека сочувствуваат со нивната мака, затоа што ниту трошоците за превоз и храна, како што бара Сојузот на синдикатите на Македонија, не ги гласаат во Собранието за да имаат право работниците на такви трошоци“, истакна Трендафилов.
Потоа, нагласи тој – во четврток, ќе ги блокираме газдите, односно Стопанската комора и Бизнис конфедерацијата на Македонија, а наредната недела, во вторник, кога Владата традиционално одржува седница, ќе бидат блокирани и владините функционери“, порача Трендафилов.
Ј. Ѓ.
