Претседателот на Србија, Александар Вучиќ, ја критикуваше заменик-генералната секретарка на НАТО, Радмила Шекеринска, на маргините на Минхенската безбедносна конференција, оценувајќи дека „многу работи што ги кажа немаат многу смисла“, пренесе РТС.
Вучиќ реагираше на изјавите на Шекеринска дека Хрватска и Албанија се сигурни и посветени сојузници на НАТО и дека нивната воена соработка има за цел да придонесе за регионалната стабилност.
„Можете да чуете многу работи од Шекеринска што немаат многу смисла. За жал, зборуваше и за други работи што навистина немаат многу смисла“, изјави Вучиќ, додавајќи дека, според него, таа сакала да ја критикува Република Српска кога изразила загриженост за сецесионистичките изјави и одлуки во регионот.
Тој нагласи дека оние кои зборуваат за состојбите на Балканот треба да покажат поголемо почитување кон Србите и да бидат внимателни во своите изјави.
Шекеринска, во интервју за агенцијата Бета, изјави дека Хрватска и Албанија се сигурни членки на Алијансата кои активно придонесуваат за зачувување на регионалната стабилност и дека НАТО не е вклучен во разговорите за можен воен сојуз меѓу Тирана, Приштина и Загреб.
„Она што генерално го гледаме е дека глобалната геополитичка ситуација има влијание и врз регионот. Забележливо е зголемување на бројот на воени вежби и инвестиции во одбраната и безбедноста. Но, секогаш ги охрабруваме сојузниците и партнерите да се вклучат во политички дијалог и во решавање на отворените прашања во регионот“, изјави Шекеринска.
Таа додаде дека Албанија и Хрватска не се само сигурни членки на НАТО, туку и значајни актери во одржувањето на мирот, посочувајќи дека двете земји учествуваат во мисијата КФОР и активно придонесуваат за стабилизацијата на регионот.
Изјавите доаѓаат во контекст на реакциите од Србија, откако Вучиќ во повеќе наврати оцени дека евентуалното здружување на силите меѓу Албанија, Хрватска и Приштина претставува закана за неговата земја.
Во меѓувреме, СДСМ остро го осуди настапот на српскиот претседател Александар Вучиќ, оценувајќи дека неговите изјави претставуваат навредливо и недолично однесување кон заменик-генералната секретарка на НАТО, Радмила Шекеринска.
„Познат по тоа што ги навредува сите оние кои не ги делат неговите ставови или му пречат, овој пат негова цел беше Радмила Шекеринска“, соопштија од СДСМ, додавајќи дека ваквиот пристап претставува обид за дискредитација на висока меѓународна претставничка.
Од партијата посочуваат дека Вучиќ „малициозно нагласил дека ‘оваа жена и луѓето кои доведоа до сецесија’“, оценувајќи дека нагласувањето на нејзиниот пол во политички контекст е понижувачко и ирелевантно за аргументите што ги изнесува.
Според СДСМ, ваквиот речник не претставува само личен напад, туку е дел од поширок проблем на деградирање на жените во политиката.
„Таквиот однос кон жените не е само личен манир, туку претставува системски проблем во политичките кругови, каде жените на високи позиции често се таргетираат врз основа на нивниот пол, со што се девалвираат нивните професионални достигнувања и придонеси“, наведуваат од СДСМ.
Партијата оцени дека ваквите изјави придонесуваат за создавање токсична политичка атмосфера и ја поткопуваат родовата рамноправност.
„Ова понижување на жените е облик на мизогинија што ја поткопува родовата рамноправност и придонесува за токсична политичка клима во регионот“, се додава во реакцијата.
СДСМ изрази целосна поддршка за Шекеринска, нагласувајќи дека таа нема никаква врска со обвинувањата што ѝ се припишуваат и дека нејзиниот политички ангажман е насочен кон стабилност и дијалог.
„СДСМ недвосмислено ја поддржува Радмила Шекеринска, која нема никаква врска со обвинувањата за сецесионизам и која секогаш се залагала за дијалог и стабилност на Западен Балкан. Нејзината улога во НАТО е доказ за силата и компетентноста на жените во меѓународната политика“, наведуваат од партијата.
Во реакцијата, СДСМ нагласува и дека како политичка партија останува посветена на принципите на родова рамноправност и поддршка на жените во јавниот и политичкиот живот.
„СДСМ е длабоко посветен на рамноправноста на жените и активно работи на промоција на родовата еднаквост во сите сфери на општеството, преку политики, програми и законски решенија што ја зајакнуваат нивната позиција“, соопштија од партијата.
Од СДСМ додаваат дека останува прашањето дали ваквите изјави се резултат на личен однос или дел од поширока политичка стратегија, потсетувајќи и на претходните тензии меѓу српските власти и НАТО во врска со безбедносните прашања во регионот.
Ј. Ѓ.
