Кантоналниот суд во Сараево одби да одреди едномесечен притвор за возачот на трамвајот Аднан Касаповиќ, кој управувал со возилото во моментот на тешката несреќа во која загина едно лице, а повеќе беа повредени. Касаповиќ е пуштен на слобода, а пред судот бил пречекан со аплауз од бројни колеги, објави Klix.ba.
Обвинителството претходно побара притвор, наведувајќи дека досегашниот тек на истрагата укажува дека несреќата најверојатно се случила поради „човечки фактор“. Според прелиминарните наоди на вештаците, трамвајот и електричниот систем биле технички исправни.
Од друга страна, одбраната на Касаповиќ тврди дека тој не е виновен и дека се обидел да ја спречи несреќата, посочувајќи дека причината била дефект на стар трамвај и откажување на сопирачките. Истото го тврдат и негови колеги од градското сообраќајно претпријатие ГРАС.
Снимено излетувањето на Трамвајот во Сараево каде загина едно лице, а има и повредени
Погребан загинатиот студент, повредена ученичка се бори за живот
Во несреќата загина 23-годишниот студент Ердоан Моранкиќ, кој беше погребан во родното Брчко во присуство на стотици граѓани, колеги и пријатели. Тој бил студент на втора година на Академијата за ликовни уметности во Сараево.
Седумнаесетгодишната ученичка Ела Јовановиќ, која исто така се наоѓала на трамвајската станица во моментот на несреќата, и понатаму се бори за живот откако ѝ била ампутирана ногата.
„Пациентката е и понатаму во единицата за хируршка интензивна нега. Континуираниот мониторинг и терапија од мултидисциплинарен тим продолжуваат“, изјави директорот на Општата болница во Сараево, Исмет Гавранкапетановиќ.
Масовни протести и оставка на премиерот на Сараевскиот кантон
Трагедијата предизвика масовни протести во Сараево, каде стотици граѓани излегоа на улиците барајќи одговорност за несреќата. Демонстрантите блокираа сообраќајници и маршираа низ центарот на градот, носејќи транспаренти со пораки „Болта бара одговорност“, „Правда се оставки“ и „Систем на смрт“.
По зголемениот притисок од јавноста, премиерот на Сараевскиот кантон, Нихад Ук, поднесе оставка.
„Младите луѓе го кренаа својот глас. Пораката на младите луѓе ми е поважна од мојата функција. Кога бирам меѓу нивниот глас и мојата функција, изборот е јасен“, изјави Ук.
Тој додаде дека верува оти општеството ќе биде подобро ако институциите внимателно ги слушаат барањата на граѓаните, особено на младите.
Политички тензии и барања за одговорност
Протестите продолжија и наредниот ден, иако со помал број учесници. Дел од демонстрантите побараа оставки од целата кантонална влада и институциите што се одговорни за јавниот превоз и безбедноста.
Неофицијалната група „Реци доста“, која првично повика на протестите, се огради од дел од политичките барања што се појавија за време на демонстрациите.
Во меѓувреме, опозициските партии најавија дека ќе бараат политичка одговорност, додека обвинителството продолжува со истрагата за утврдување на причините за несреќата.
Ј. Ѓ.
