СДСМ го обвини премиерот Христијан Мицкоски дека користел владин авион за патување на Јадранското Море, додека работниците во државата протестираат за повисоки плати и подобар животен стандард.
На прес-конференција, портпаролката на СДСМ, Богданка Кузеска, изјави дека ваквото однесување претставува „срамна слика за една власт опиена од луксуз“, обвинувајќи дека премиерот користи јавни ресурси за приватни цели.
„Со владин авион и парите од граѓаните премиерот бил на Јадранско Море. Додека граѓаните едвај врзуваат крај со крај, премиерот се луксузира врз грбот на народот“, изјави Кузеска.
Обвинувања за луксуз додека граѓаните се соочуваат со економски притисок
Од СДСМ посочија дека владата одбива да ја зголеми минималната плата на 600 евра и дека, според нив, се намалени средства за земјоделците, додека истовремено се користат државни ресурси за патувања на функционери.
Кузеска истакна дека, според нивните тврдења, владиниот авион бил користен и за патувања на други владини претставници, наведувајќи ја Будимпешта како една од дестинациите.
Повик премиерот да одговори за користењето на авионот
СДСМ побара од премиерот да одговори колку ги чинеле граѓаните овие патувања и дали се оправдани со оглед на економската состојба.
„Нека им одговори на работниците колку ги чини овој луксуз со владиниот авион“, изјави Кузеска.
Од партијата поставија и прашање дали најавите за набавка на нов владин авион се поврзани со, како што наведуваат, можноста за нови службени патувања.
Владата тврди дека нема злоупотреба на службениот авион
Владиниот авион е користен исклучиво во согласност со прописите и не постои никаква злоупотреба, соопшти Владата на Република Северна Македонија, реагирајќи на обвинувањата од опозицијата.
Во соопштението, Владата наведува дека секое користење на авионот е евидентирано, документирано и предмет на институционална контрола, согласно Правилникот за условите и начинот на користење на воздухопловот.
„Ниту една активност не е надвор од утврдените процедури, ниту постои каква било форма на злоупотреба“, се наведува во реакцијата.
Од Владата посочуваат дека опозицијата ја игнорира, како што велат, хуманитарната и државничката димензија на користењето на авионот, нагласувајќи дека истиот бил ставен во функција и при итни ситуации.
Според соопштението, авионот бил користен за транспорт и координација на активности поврзани со повредените во трагичниот пожар во Кочани, со цел спасување човечки животи.
Владата ја обвини опозицијата за политичка хипокризија, тврдејќи дека истите политички структури во минатото го користеле владиниот авион за контроверзни патувања.
„Денешните обиди за морализирање претставуваат класичен пример на политичка хипокризија. Кога беа на власт, ги злоупотребуваа службените ресурси и не иницираа суштински реформи“, се наведува во соопштението.
Од Владата нагласуваат дека остануваат посветени на принципите на законитост, отчетност и транспарентност и дека секој надлежен орган има право да изврши увид и контрола.
„Немаме што да криеме. Наш приоритет остануваат заштитата на јавниот интерес и унапредувањето на меѓународната позиција на државата“, се додава во реакцијата.
Ј. Ѓ.
