– Лажна вест е тврдењето на СДСМ дека семејството на Премиерот Христијан Мицкоски патувало до Сплит, Хрватска. Службениот авион стар 20 години е користен исклучиво од премиерот Мицкоски, без семејна придружба за негови службени потреби, и во период од две години само за 4 патувања во соседството, известуваат со соопштение од Владата на Северна Македонија.
„Лицемерно е однесувањето на СДСМ и лидерот Венко Филипче, кој во затворени разговори се согласува за набавка на нов владин авион, а во јавност сосема спротивно истото го критикува. Додека СДСМ и Венко самите се договорат со себе, апелираме информациите кои произлегуваат од оваа партија да се земаат со голема претпазливост поради нејзините шпекулативни намери“, се нагласува во владиното соопштение.
Претходно опозициската партија СДСМ го обвини премиерот Христијан Мицкоски за, како што велат, неодговорно и контрадикторно однесување во врска со користењето на владиниот авион, откако тој изјави дека се плаши за својот живот кога лета со државниот воздухоплов.
Во соопштението, СДСМ наведува дека изјавата на премиерот отвора сериозни прашања за неговото однесување, особено во контекст на наводното користење на авионот за приватен одмор.
„Ако тоа е вистина, тогаш се поставува суштинско прашање: како можел тогаш во таков авион да го стави своето семејство и да ги ризикува нивните животи заради приватен одмор?“, прашуваат од СДСМ.
Партијата обвинува дека со користењето на владиниот авион за приватни цели, премиерот не само што злоупотребил државни ресурси, туку и покажал неодговорен однос кон безбедноста.
„Ако навистина смета дека авионот е ризичен, тогаш постојат редовни комерцијални линии со економска класа. Наместо тоа, граѓаните го плаќаат овој авион“, се наведува во соопштението.
Од СДСМ додаваат дека ваквите изјави и постапки отвораат пошироки дилеми за одговорноста на премиерот и неговиот однос кон јавните ресурси и институциите.
„Ако толку неодговорно се однесува кон сопственото семејство, како ли се однесува кога е во прашање државата?“, прашуваат од партијата.
Премиерот Мицкоски претходно изјави дека користењето на владиниот авион го прави со чувство на ризик и дека се надева на безбедност при секој лет, што предизвика политички реакции и критики од опозицијата, што резултираше Мицкоски да најави дека нема да има набавка на владин авион.
Ј. Ѓ.
