Агенти на американската Тајна служба застрелаа и убија 21-годишен маж од Северна Каролина кој незаконски влегол во обезбедениот периметар на Мар-а-Лаго, резиденцијата на актуелниот претседател на САД Доналд Трамп во Палм Бич, Флорида. Инцидентот се случил околу 1:30 часот по локално време.
Според официјалните информации, мажот успеал да помине низ влезната капија во момент кога друго возило го напуштало комплексот. Американските медиуми го идентификуваа како Остин Такер Мартин. Наводно со себе носел сачмарка и канистер со гориво.
Тајната служба соопшти дека агентите му наредиле да ги фрли предметите што ги носи. Наместо да постапи по наредбата, осомничениот го кренал оружјето „во положба за пукање“, по што агентите отвориле оган и го усмртиле на лице место.
Во моментот на инцидентот, претседателот Доналд Трамп и Меланија Трамп не биле во Флорида, туку во Вашингтон.
ФБИ ја презеде истрагата
Федералното истражно биро (ФБИ) ја презеде истрагата и соопшти дека ги вложува сите неопходни ресурси за утврдување на околностите и можниот мотив. Засега не е познато дали станува збор за организирана намера, индивидуален чин или лице со психолошки проблеми.
Главната државна обвинителка Пам Бонди потврди дека е во контакт со претседателот и дека се координира со федералните служби.
Семејството претходно го пријавило како исчезнат
Според медиумските извештаи, семејството на Мартин неколку дена претходно го пријавило како исчезнат. Неговиот роднина изјавил дека доаѓа од семејство кое е силен и жесток поддржувач на Доналд Трамп.
Тој го опишал како тивок и повлечен млад човек и изразил неверување дека би можел да направи ваков чин.
Братучедот на осомничениот, 19-годишниот Брејден Филдс, изјави за Асошиејтед Прес дека е во шок од она што се случило.
Тој рече дека Остин Такер Мартин, потекнува од семејство кое политички го поддржува Трамп.
„Сите сме големи поддржувачи на Трамп. Сите ние“, рече Филдс.
Тој додаде дека 21-годишниот Мартин не зборувал за политика и бил „многу тивок, никогаш навистина не зборувал за ништо“.
„Тој е добар човек“, рече Филдс, додавајќи дека Мартин донирал дел од секоја плата што ја заработувал на локално голф игралиште во добротворни цели.
„Не можам да верувам дека би направил нешто вакво. Неверојатно е.
„Не би повредил ни мравка. Тој дури ни не знае како да користи пиштол“.
Мотивот останува непознат
Истрагата продолжува, а засега не е објавена официјална информација за мотивот зад обидот за упад во строго обезбедениот претседателски имот.
Редакција Фронтлајн
