„Мора да бидете отпорни на токсично влијание од Русија и другите и нема да дозволиме тројански коњи во Европската унија“ – со оваа порака еврокомесарката за проширување Марта Кос ја предупредила Македонија за странските влијанија, изјави Андреј Жерновски од СДСМ на денешната прес-конференција.
Жерновски рече дека ова е „најјасната порака што досега ја добила државата од еврокомесар за проширување“.
„Граѓаните мора да знаат дека оваа порака се однесува на нашата земја. Токсично е влијанието од Русија, токсично е влијанието од Кина, токсично е влијанието од СНС на Вучиќ“, изјави Жерновски.
Тој се повика и на извештајот на известувачот за Македонија во Европскиот парламент, Томас Вајц, во кој, според него, се наведува дека нема напредок во повеќе области.
„Нема напредок во владеењето на правото, во правосудните реформи и во борбата против корупцијата. Нема напредок ниту во состојбата со медиумите“, рече Жерновски.
Според него, Македонија има блокиран пат кон Европската унија, за што ја обвини актуелната влада.
„Пораките се многу јасни, но нашата влада повторно измислува непријатели, особено во нашето соседство, само за да го блокира нашиот пат кон Брисел“, изјави Жерновски.
Тој додаде дека, според последните анкети, околу 70 проценти од граѓаните ја поддржуваат интеграцијата на земјата во Европската унија.
„Ова е вистинскиот момент кога треба да одиме напред и да го искористиме расположението во Европската унија за проширување“, рече Жерновски.
На прес-конференцијата беа изнесени и обвинувања за политички и економски влијанија од странство.
„Вториот човек на владата се гледа со Ноќните волци блиски до Путин“, рече Жерновски, додавајќи дека постојат и економски врски со Кина преку, како што рече, „унгарскиот кредит“.
„Зошто Македонија да биде црната точка во Европската унија? Албанија напредува, Црна Гора напредува, а ние останавме заковани на дното“, изјави Жерновски.
На крајот од прес-конференцијата тој порача дека борбата за членство во Европската унија ќе продолжи.
„Патриотизам е земјата што ја сакаш да ја внесеш во НАТО и да овозможиш безбедност на сограѓаните. Предавство е да ја изолираш земјата и да ја блокираш иднината на граѓаните“, рече Жерновски.
