Министерот за транспорт, Александар Николоски, денеска информираше дека во Хрватска е усвоен закон кој ќе им овозможи на професионалните возачи да добиваат долгорочни визи. Оваа мерка, според министерот, претставува значаен чекор напред во решавањето на проблемите со кои се соочуваат транспортерите по воведувањето на новиот ЕЕС (Entry/Exit System) во Шенген зоната.
Николоски потенцираше дека донесувањето на овој закон е директна реализација на договорот што тој го постигнал со хрватскиот вицепремиер и министер за море, транспорт и инфраструктура, Олег Бутковиќ, за време на нивната средба во јануари оваа година.
„Овој закон многу ќе им помогне на македонските професионални возачи“, истакна ресорниот министер во својата објава, укажувајќи на важноста на ова решение за непречено одвивање на меѓународниот транспорт.
Тој додаде дека Хрватска не е единствената земја со ваков пристап, посочувајќи дека и Швајцарија веќе издава долгорочни визи за оваа категорија граѓани. Министерот изрази очекување дека наскоро и други европски држави ќе се приклучат кон оваа иницијатива.
На крајот од своето обраќање, Николоски порача дека институциите продолжуваат да работат на изнаоѓање конструктивни решенија за поддршка и олеснување на работата на македонските професионални возачи.
