Мрежата за заштита од дискриминација преку писмена реакција изрази сериозна загриженост поради, како што велат, сè почестото вклучување на контроверзното здружение „Родителски фронт“ од Струмица во собраниските јавни расправи и институционалните процеси.
Според нивното соопштение, претставници на ова здружение од почетокот на годината биле поканети на најмалку две собраниски дебати – едната за измените на Кривичниот законик, а другата за влијанието на социјалните мрежи врз младите. Од Мрежата сметаат дека ваквиот пристап не е само техничко отворање простор за граѓанскиот сектор, туку институционално легитимирање на актер чиј јавен дискурс го оценуваат како длабоко проблематичен.
„Нивните јавни објави и настапи покажуваат јасен образец на анти-ЕУ реторика, ширење морална паника, теории на заговор и дезинформации, особено во однос на родовата еднаквост, ЛГБТИК+ правата и сеопфатното сексуално образование“, се наведува во реакцијата.
Од Мрежата посочуваат дека во комуникацијата на „Родителски фронт“, меѓународните институции како ЕУ, УНИЦЕФ и Светска банка, како и граѓанските организации, редовно се претставуваат како носители на „странска агенда“ и „закана“ за децата и државата. Дополнително, од Мрежата обвинуваат дека здружението континуирано ги напаѓа академските институции, вклучително и Катедрата за родови студии при УКИМ, поставувајќи се како арбитар над експертите.
Ваквиот јазик на страв и непријателство, велат од Мрежата, произведува општествена поларизација и ја поткопува довербата во демократските институции и јавните политики засновани на човекови права.
Поради ова, Мрежата за заштита од дискриминација бара од Собранието и релевантните институции да воспостават јасни критериуми за учество на граѓански организации во јавните расправи. Тие инсистираат процесите поврзани со млади, образование, насилство и човекови права да се темелат исклучиво на докази, професионална експертиза и академска автономија.
На крајот од соопштението, од Мрежата информираат дека нивното писмо било испратено преку службените електронски пошти до сите пратеници и до архивата на Собранието, но оттаму добиле известување дека нема да биде дистрибуирано бидејќи е потпишано само од нивната организација.
