Опозицискиот Социјалдемократски сојуз на Македонија (СДСМ) упати сериозни обвинувања до Владата за водење двојна и антиевропска политика. Портпаролката и членка на Извршниот одбор на партијата, Богданка Кузеска, на прес-конференција реагираше на учеството на вицепремиерот Иван Стоилковиќ на 7-от состанок на локалните лидери на Кина, каде што тој престојува заедно со српската делегација.
Кузеска јавно го отвори прашањето како е можно во земја која е полноправна членка на НАТО и кандидат за членство во Европската Унија, вториот човек во државата отворено да промовира стратешка соработка со Пекинг.
Според СДСМ, овој чекор јасно ги демаскира вистинските намери на актуелната власт.
„Човекот кој јавно се дружи со ‘Ноќните волци’ на Путин, кој слави со проруските структури во Република Српска и кој е тесно поврзан со српските безбедносни служби, сега директно заговара продлабочување на врските со Пекинг. Ова не е дипломатија, ова е јасна антиевропска и антизападна политика на криминалната група на власт“, изјави портпаролката на опозицијата.
„Со едната рака ветуваат ЕУ, со другата работат за руските и кинеските интереси“
Кузеска потенцираше дека премиерот Христијан Мицкоски, вицепремиерот Иван Стоилковиќ и владејачката ВМРО-ДПМНЕ реално не сакаат реформи, правда ниту членство во Европа. Напротив, според опозицијата, нивната цел е изолација на државата, создавање зависност од автократски режими и продолжување на криминалот без каква било меѓународна контрола.
Од опозициската партија порачаа дека граѓаните веќе јасно ја гледаат двојната игра на Владата, која декларативно ветува интеграција во ЕУ, а во пракса работи за руските интереси и за Кина. Поради ова, СДСМ побара итно прекинување на ваквите политики и итно фокусирање на европската агенда преку пораката „Реформи сега, Европа сега“.
