пишува: ЈАНЕ ЃОРЃИОСКИ
Откако утрово по наредба на ОЈО за гонење организиран криминал и корупција е приведен Драги Рашковски, поранешен генерален секретар на Владата, лидерот на опозициската ВМРО-ДПМНЕ Мицкоски, реагира дека требало да се спроведе Рашковски во суд со лисици на рацете.
Мицкоски се изгуби во преводот од својот коментар. Тој со оваа објава сака да не потсети на спроведувањата и тортурата врз обвинетите, а сè уште не осудени лица, како што беше пракса за време на режимот на неговиот Груевски и ВМРО-ДПМНЕ.
Што сака да ни порача Мицкоски?
Дека ќе летаат глави на сите страни, ако евентуално некогаш се дочепаат до власт. Дека ќе се изживуваат врз осомничени лица; дека не разликуваат обвинет од осуден; дека манифестацијата на сила е метод на нивно владеење… Што?
И не мора многу да се труди Мицкоски да не’ убедува во тоа. Добро се сеќаваме на нивните „практицирање на правдата“.
Сликите од приведувањето на Љубе Бошкоски не може да се заборават така лесно. Кога буквално му цапаа на врат специјалците пратени од Мијалков. Или она кога ја повторувале сцената од неговото приведување неколку пати оти камерите тоа добро не го фатиле.
Приведувањето на новинарот Кежаровски, може ли да го заборавиме? Во пет часот наутро маскирани специјалци или што ли беа, упаднаа во неговиот семеен дом. Со покажување агресивност и ставање на лисици на рацете и малтретирање на Кежо, а тој не давал никаков отпор при приведувањето. Стравот и траумите што ги преживеале неговата сопруга и тогаш малолетната ќерка може ли да ги претпоставиме?
Како да беше денес се сеќавам на опсадата со оклопни борбени возила и полициските до заби вооружени „желки“ во А1 Телевизија. Како малтретираа и држеа во заложништво новинарки и новинари, па потоа да финишираат со лисици на рацете на сопственикот на А1 ТВ, Велија Рамковски.
На вакви ли приведувања/спроведувања, нè спрема Мицкоски? На ова ли нè потсетува?
Од друга страна, сега навистина е поинаку.
Како што потсетува и новинарката Емилија Лазаревска во својата фејсбук-објава – немаше лисици до правосилност на пресудата при приведувањето на Гордана Јанкулоска, Миле Јанакиески, Мијалков, Камчев, Чавков и други, буквално сите од партијата на Мицкоски.
„Во владеење на ВМРО ДПМНЕ беа театри. Апсења, лисици, со целосна воена опрема упаѓаа по куќи, плашеа семејства… Ќе почекам да видам епилог, но и ова само по себе е нешто различно од порано.“, пишува Лазаревска
Па, не знам што друго би требало да очекуваме од еден ваков Мицкоски и онакво негово ДПМНЕ. Методите на опресија се не својствени за демократски држави и на Мицкоски треба да му е јасно дека таквиот начин на практикување власт е веќе минато. Некој од тие околу него нека го потсети дека времето на баши-бозукот на неговата партија е завршено.
Но, кој ќе го направи тоа, драги мои?
Може ли таква доблест да очекуваме од координаторот на пратеничката група Никола Мицевски, оној незграпен силник кој вчера ја разбркуваше пратеничката од СДСМ Маркоска низ Собрание и не и даваше да говори, или пак од циникот Јанушев кој слушавме како се заканува дека ќе и дели шамари на неговата сопартијка Рангелова?
Од оваа ваква пратеничка багра која наместо да седне во пратенички клупи, се вади на процедури, се изживува и гледа пренос во ходници од Собранието и бескрупулозно стопира закони и пакет-мерки, „живи“ пари кои треба да ги добијат граѓаните и фирмите? Од вакви ли негови нус појави треба да очекуваме дека ќе го вразумат Мицкоски?
Ма дајте ви се молам?!
