Редакцијата на Зелен ЦИВИЛ вчера се обрати до Министерството за труд и социјална политика за коментар или образложение на изјавата на раководителот на Одделението за животна средина во Општина Шуто Оризари, Георги Клинчаревски, за праксата малолетник да изнесува отпад на запрежни коли и да не се знае каде завршува тој отпад.
„Според Законот за социјална заштита, кај малолетно лице се поставува старател доколку лицето е без родители и родителска грижа или родителите се спречени да го вршат родителското право. На подрачје на Општина Шуто Оризари има подрачно Одделение за давање на права и услуги од областа на социјалната и детска заштита и во случај на сомнеж дека некое дете е злоупотребено треба истото да биде пријавено во подрачното одделение. По добиената пријава стручниот тим ќе ја утврди фактичката состојба и ќе постапи согласно Законот за социјала заштита“, одговорија од МТСП на прашањето на ЦИВИЛ дали се запознаени со праксата во Шуто Оризари за ангажирање малолетници за транспорт на отпад.
Во својата изјава Клинчаревски на панелот на Зелен ЦИВИЛ „Отпад, регулација на отпад, состојби и решенија“ вели дека: „Еколошката свест на населението е на ниско ниво. На нив им е полесно да најдат некој малолетник. Кантите со отпад, да ги фрлат во кола со коњи и тоа дете ги носи некаде. Малолетник, а според Законот за малолетници ние не смееме да интервенираме. Треба да има старател, не можеме него да го казниме. Исто и полицијата. Има и такви случаи кои ние не можеме да ги решиме“.
Во телефонски разговор со Клинчаревски побаравме коментар за одговорот на МТСП и го прашавме дали некогаш во било која прилика пријавиле случај каде малолетник бил искористен за пренос на отпад.
Клинчаревски потврди дека подрачното Одделение за социјална и детска заштита функционира, работи, но досега не пријавиле ниту еден случај. Најголемиот проблем е што не можат да ги легитимираат децата, ниту да дознаат за нивните старатели или родители. Проблемот е што граѓаните се кријат меѓу себе и кога и да прашаат велат дека не ги познаваат. Клинччаревски вели дека имаа тројца комунални редари кои работа до 16 часот, па е тешко да се детектираат ваквите случаи во попладневните и вечерни часови.
Клинчаревски рече дека и редарите и градоначалникот на Шуто Оризари, Курто Дудуш, ќе ги запознае со одговорот од МТСП и ќе гледаат да ги анулираат ваквите случувања во иднина.
Извор: Зелен Цивил
