Популарниот актер Мет Дилон во видео порака за Македонската телевизија објави поддршка за изградба на технолошкиот парк во Скопје. Инвеститорите бараат забрзување на процедурата, зашто секој ден е важен за проектот што треба да донесе развој на регионот.
Инвеститорите со Отворено писмо до Владата бараат побрзо одобрување на одлуката за изградба на Технолошки парк во Скопје. Велат – секој ден е важен за инвестицијата што треба да донесе развој за целиот регион. „Економскиот ефект ќе биде голем. Не помалку важен е и едукативниот и забавниот“, изјави за МТВ првиот човек на компанијата што планира да вложува. Поддршка за проектот и од холивудската ѕвезда Мет Дилон.
На почетокот на август, познатата американска филмска ѕвезда Џон Малкович најави дека во Скопје ќе се снимаат холивудски филмови, веднаш откако ќе се изградат повеќе филмски студија во околината на градот во рамки на проектот „Скопје технолошки парк“.
Би сакал да ги поздравам моите македонски пријатели и да ви кажам колку сум возбуден што ќе соработувам со своите колеги професионалци Д.В. Мафет и Мет Дилон на создавање филмско, музичко и медиумско студио од холивудски калибар, со сертификат за еколошка градба во Скопје. Прво студио од ваков тип на целиот Балкан, изјави Малкович за МРТ.
Тој најави дека ќе го посети Скопје веднаш откако Владата ќе го одобри проектот „Скопје технолошки парк“.
Решивме да го наречеме проектот „Стоунбриџ студија“ во чест на богатата култура и неверојатната историја на македонскиот народ, истакна Малкович.
Порача дека како балканец по потекло му придава специјално значење на овој проект.
Возбудени сме не само затоа што ќе работиме и ќе снимаме холивудски филмови во Скопје, туку ќе помогнеме уште повеќе да се зајакне балканскиот филм, како и музичките и уметничките заедници на секој можен начин. Цврсто верувам дека проектот ќе биде од клучно значење за земјата и ргионот, рече Џон Малкович.
