„Образованието не може и не треба да се сведе само на она што ние како лекција ќе им го пружиме на младите во текот на образованието, туку и вредностите кои им ги пренесуваме. На тој макотрпен пат, од нас зависи дали ќе успееме да создадеме генерации, кои ќе ги опсервираат нештата низ критичка призма и ќе носат одлуки базирани на факти со цел да создадат подобри услови за квалитетен живот“ рече премиерот Димитар Ковачевски при посетата на лабораторијата АМБИКОН при Универзитетот Гоце Делчев во Штип.
Тој додаде дека токму затоа политиките на Владата се засноваат на потребите на младите со зајакнување на техничките капацитети во образованието и во квалитетот на образованието.
„Од вкупниот буџет за научно-истражувачка дејност за 2023 година, најголем дел се предвидени за национални научно-истражувачки проекти, потоа се планира поддршка на научни трудови, организирање научни собири, учество на домашни истражувачи на меѓународни научни собири во странство, студиски престои во странство и престој на странски научни истражувачки тимови во Република Северна Македонија, како и надоместок за средства за објавени научни трудови во списание со импакт фактор“ рече Ковачевски.
Премиерот додаде дека продолжуваат да се доделуваат стипендиите за средношколците и студентите и најави дека годинава се предвидени 50 стипендии за студии од втор циклус во земјата од областа на природно- математичките и техничко-технолошките науки со месечна стипендија од 9.000 денари за девет месеци во годината.
„Планирани се и 15 стипендии за студии од трет циклус во земјата од областа на природно – математичките и техничко-технолошките науки, со месечна стипендија од 18.000 денари во текот на целата година. Предвидени се и стипендии и уписнини за студии од втор и трет циклус во странство според Шангајската ранг листа, како и еднократен надомест за одбрана на магистерски и докторски трудови. Додека, најголемите остварувања во областа на науката се потврдуваат со доделување на државната награда ‘Гоце Делчев’“ рече Ковачевски.
