Владата на Белгија денеска донесе одлука да додели најголем пакет воена помош за Украина во износ од 92 милиони евра.
„Денеска Советот на министри одлучи да и испрати на Украина нов пакет воена помош во вредност од 92 милиони евра“, рече премиерот на Белгија Александар Де Кру, пренесува „Укринформ“.
Вкупниот воен придонес на Белгија во напорите за поддршка на Украина ќе достигне 228 милиони евра.
Според министерот за одбрана на Белгија, Лудивин Дедондер, пакетот ќе вклучува ракети за противвоздушна одбрана, противтенковско оружје, муниција, гранати, митралези, автоматски пушки и лесни оклопни возила, но во пакетот нема да бидат вклучени тешки оклопни возила тенкови, бидејќи, како што вели Дедондер, нема повеќе тенкови во белгиските одбранбени резерви, пренесува „Кијив Индепендент“.
Тој додава дека дел од опремата ќе биде земена од магацините на Министерството за одбрана на Белгија, а дел ќе биде набавена од приватни компании.
Ова доаѓа неколку дена откако Германија одлучи да испрати тенкови „Леопард 2“ во Украина и да им дозволи на други земји како Полска да го направат истото. Исто така, Американските власти потврдија дека Вашингтон е подготвен да испрати десетици свои борбени тенкови „М1 Абрамс“.
Дополнително, Белгија и дава на Украина 69 милиони евра хуманитарна помош, а премиерот Де Кру исто така истакна дека руските средства во Белгија во вредност од 58 милијарди евра веќе се замрзнати.
Како што пренесува Укринформ, белгискиот министер за одбрана Лудивин Дедондер ги посетил украинските бранители кои се на лекување во воената болница „Кралица Астрид“ во Брисел.
А.Р.
