Годинава предвидуваме дека годишната инфлација ќе биде 7,1%, а сега минималната плата се зголеми за 12 процентни поени, што значи номинално ќе има повеќе средства за трошење, изјави вицепремиерот за економски прашања Фатмир Битиќи во гостувањето на Сител телевизија.
Тој додаде дека не се согласува со пресметките дека растот на минималната плата ќе биде изгубен поради инфлацијата.
Од аголот на вицепремиер, но и како граѓанин кој пред да влезе во политиката бев од другата страна, кога се борев со структура која ги плаќаше граѓаните како да се евтина работна сила, можам да кажам дека работник што се продава за 10 илјади денари сметам дека е навистина жално за една држава, истакна Битиќи.
Според него, до изборите во јули 2024 година веројатно со новата утврдена методологија ќе има минимална плата од 23 илјади денари.
Нашата структура на БДП се заснова на две третини од приватната потрошувачка, а тоа се луѓето со повеќе средства кои ќе можат да трошат. Тоа не сметам дека ќе ја подгрее инфлацијата, напротив ова ќе го зголеми растот на платите во јавниот и приватниот сектор, а тоа секако и ќе доведе до зголемување на продуктивноста, рече Битиќи.
