Започнуваат градежните инфраструктурни зафати на граничниот премин Табановце за проширување на пристапните сообраќајници од македонска страна што има за цел забрзување на протокот на возила и олеснување на трговијата. Активностите се во целосна координација со институциите од српска страна каде наскоро ќе започне сличен инфраструктурен зафат, информираат од Царинската управа.
Оттаму наведуваат дека планираните активности се во рамки на иницијативата Отворен Балкан и согласно потпишаниот Меморандум помеѓу Владата на Република Северна Македонија и Владата на Република Србија, во кој се содржани мерките за забрзување на движењето на возила, луѓе и стоки преку заедничката државна граница.
Градежните зафати се очекува да завршат во првата половина од следниот месец, пред почетокот на туристичката сезона.
Исто така, во периодот што следи ќе започне да се применува и мерката за признавање на потврдите за вагање на товарните возила помеѓу Царинските управи на двете земји, со што ќе се намали времето за спроведување на царинските формалности.
Дополнително, Царинската управа работи и на воведување на концептот на т.н. паметни граници, што подразбира поставување нова опрема, односно нов систем за видео надзор и препознавање на регистарските таблички на возилата интегриран со читачи на кодови на документи, како и поставување на нови автоматизирани рампи и ваги.
Овие мерки ќе придонесат за забрзан проток на граничниот премин Табановце и намалување на трошоците на патниците и економските оператори, што ќе влијае позитивно на меѓународната трговска размена во регионот.
И од Српската влада известуваат дека работите за проширување на граничниот премин ќе завршат пред почетокот на туристичката сезона
Пред почетокот на летото ќе завршат работите за подобрување на сообраќајниот пристап на граничниот премин Прешево – Табановце, кои опфаќаат проширување на пристапните патишта од српска и од македонска страна. Оваа делумна реконструкција на преминот ќе резултира со одредено забрзување на протокот на возила и намалување на задржувањето на бројот на граѓани на граничниот премин, јави дописникот на МИА од Белград.
-Работите се изведуваат како дел од Иницијативата Отворен Балкан. Реконструкцијата на преминот е еден од резултатите од Меморандумот потпишан меѓу Владата на Република Северна Македонија и Владата на Република Србија, кој содржи мерки за забрзување на движењето на возила, луѓе и стока преку државната граница, соопштија од српската влада.
Во соопштението се наведува дека работите што денеска почнуваат од македонска, од српска страна на границата ќе започнат следната недела, а се очекува да завршат во првата половина на следниот месец, пред почетокот на туристичката сезона, а тоа, покрај одредено намалување на метежот на границите, исто така, ќе ја олесни трговијата меѓу двете земји.
-Имено, во периодот што следи се очекува да се спроведат мерки за признавање на сертификати за мерење на товарните возила меѓу царинските управи на двете земји, со што ќе се скрати времето за спроведување на царинските формалности, наведуваат од српската влада.
Овие мерки, додаваат, ќе придонесат за забрзан проток на граничниот премин Прешево – Табановце и за намалување на трошоците за патниците и деловните субјекти, што позитивно ќе се одрази на меѓународната трговија во целиот регион.
-Ова се само некои примери за тоа како Иницијативата Отворен Балкан го забрзува протокот на луѓе, стоки и услуги и заштедува време за граѓаните и стопанството при преминување на државните граници, се наведува во соопштението од српската влада.
