„Северна Македонија е во фаза на негативна кампања, која и претходи на претстојната изборна кампања. Национализмот и радикалните теми се во преден план“, вели за „Фронтлајн“ политичкиот аналитичар Бесим Небиу, зборувајќи за политичките актуелности во земјава.
– Се наоѓаме во фазата на негативна кампањи, која и претходи на предизборната кампања. Националните и националистички теми и радикализацијата се на прв план, како по традиција, тоа е подрачје во кое десничарските македонски партии и ДУИ од албанската страна, ги заострувале реториките во очекуање на така наречените „патриотски гласови“. Но, овој пат, ДУИ игра на „европската карта“ избегнувајќи ги националните теми во оваа фаза, оставајќи ги ВМРО-ДМПНЕ и Левица сами во националистичките води, вели Небиу.
Што се однесува до Албанската опозиција (Движењето БЕСА, Демократското движиње, Алтернатива), додава тој, и таа досега се држи настрана од пренагласување на „патриотските теми“, настојувајќи да се профилираат како голема коалиција од неколку опозициски партии.
– Очекувам со наближување на кампањите, сите партии да создадат програмски понуди за владеење во следниот четири годишен мандат, кој се состои од програми и идеи за владеење. Сепак, кампањата официјално не е започната, затоа очекувам ова да се случи некаде во февруари или март, нагласи тој.
Врз основа на договорот што го постигнаа лидерите на парламентарните политички партии, првиот круг од претседателските избори ќе се одржи на 24 април, додека на 8 мај ќе има двојни избори – вториот круг од претседателските и парламентарните избори.
Изборната кампања официјално започнува 20 дена пред изборите. До крајот на месецов се очекува да се гласа во Собранието и техничката Влада која ќе биде надлежна за организирање на претседателските и парламентарните избори. ДУИ соопшти дека за премиер на техничката влада ќе го предложи Талат Џафери, актуелен претседател на Собранието. Пратеникот Јован Митрески е предлогот на СДСМ за претседател на Собранието.
Дестан Јонузи
Поврзано:
ВМРО-ДПМНЕ наместо да презентира изборна програма, води предвремена „црна“ изборна кампања
