Градоначалникот на Општина Центар, Горан Герасимовски, на средбата со жителите од строгиот центар на Скопје разговараше за најгорливите урбани предизвици: сообраќајниот метеж,загадениот воздух и потреба од алтернативен превоз.
„Она што секојдневно го отежнува животот во Центар е хаосот во сообраќајот. Затоа вложуваме во решенија за почист воздух и подобар квалитет на живеење“, истакна Герасимовски.
Тој потсети дека Центар е првата општина што воведе субвенции за алтернативен превоз, велосипеди, електрични велосипеди и тротинети , мерка што се надградува од година во година:
„Во мојот мандат воведовме и субвенции за дополнителна опрема, за што интересот постојано расте. Само годинава, од предвидените 600.000 денари за велосипеди, веќе се субвенционирани 197 граѓани”, рече Герасимовски, посочувајки дека во последните три години се дадени субвенции за над 500 велосипеди.
Како поддршка на проектот „Цел Центар на точак“, Општината постави и сервисни станици и држачи за велосипеди на локации предложени од самите граѓани.
Со одлука на Советот од 2022 година, Центар стана првата општина што воведе обврска за обезбедување велосипедски паркинг како дел од условите за добивање градежна дозвола – решение усогласено со европските стандарди за енергетска ефикасност.
„Жителите на Центар заслужуваат модерен и одржлив град. Затоа продолжуваме со инвестиции во алтернативен превоз, почиста животна средина и поздрав начин на урбано живеење“, порача Герасимовски.
