Во трката за градоначалник на Општина Чаир, кандидатот на Алијансата за национална интеграција, Бујар Османи, и кандидатот на коалицијата ВЛЕН, Изет Меџити, претставија детални програми за периодот 2025–2029 година, кои вклучуваат крупни проекти во инфраструктурата, животната средина, образованието и јавните услуги.
Во предизборната трка за Општина Чаир, двајцата кандидати – Бујар Османи од Алијансата за национална интеграција и Изет Меџити од коалицијата ВЛЕН – настапуваат со програми кои предвидуваат значителни промени во изгледот и функционирањето на оваа урбана општина.
Инфраструктура
Бујар Османи во својата програма вети проширување на неколку клучни улици, меѓу кои „Цветан Димов“ со подземен премин и плоштад „Лирија“ со подземен паркинг, како и проширување на улиците „Џон Кенеди“, „Митхат Фрашери“ и нов кружен тек на крстосницата помеѓу „Џон Кенеди“ и „Митхат Фрашери“. Неговиот план вклучува и изградба на подземен паркинг кај училиштето „Васил Главинов“ и градинката „Снежана“, на површина од 40.000 м² со надземен простор за образовни објекти.
Изет Меџити, од своја страна, најави изградба на повеќекатни гаражи на неколку локации, вклучувајќи го плоштадот „Скендербег“, комплексот „Чаирчања“ и населбите „Саук Чешма“ и „Топанско поле“. Во план се и реконструкции на улиците во стар дел на Чаир и во населбите „Тенеќе Маало“ и „Топанско поле“.
Животна средина
Османи вети урбанизација на Чаир со повеќе зелени површини и детски игралишта, како и подземен паркинг на улицата „Методија Митевски“ со три ката и зелена површина над него.
Меџити, пак, најави реконструкција на паркот „Чаир“, воведување подземни контејнери и системи за селекција на отпад, како и инсталација на фотоволтаични системи и поддршка за јавното претпријатие „Старо Скопје“.
Јавни услуги
Во областа на комуналните услуги, Османи предвидува паметен систем за јавно осветлување, субвенции за енергетска ефикасност и ново јавно претпријатие за управување со чистотата, осветлувањето и културното наследство во Старата Чаршија.
Меџити вети подобрување на осветлувањето и електричната инфраструктура во населбите, како и изградба на јавни тоалети во Чаршијата.
Образование
Османи најавува комплетна реконструкција на училишта, изградба на спортски сали, лаборатории STEM, дигитални табли во секоја училница и центар за психо-социјална поддршка.
Меџити, пак, планира изградба на нова основна школа, неколку градинки и проширување на капацитетите на училиштето „Хасан Приштина“, како и подобрување на безбедноста во училишните дворови.
Транспарентност и отчетност
Програмата на Османи вклучува дигитална платформа за транспарентност, јавен пристап до буџетот и трошоците на општината, како и користење на вештачка интелигенција за мониторинг на јавните набавки.
Меџити предвидува целосна дигитализација на услугите, анкети и граѓанска платформа за предлози и поплаки, како и редовно објавување извештаи за работата на општината.
Култура, спорт и социјална политика
Османи најавува изградба на мултифункционален културен центар, поддршка за пензионери и младински програми, како и грантови за стартап компании и програми за млади.
Меџити планира фестивали на традицијата и младите таленти, изградба на спортски сали и игралишта, како и создавање на центар за младинско претприемништво и инкубатор за стартапи.
Овие се осмите локални избори од независноста на земјата. Првиот изборен круг ќе се одржи на 19 октомври, а вториот на 2 ноември. Кампањата за првиот круг започна на 29 септември и ќе трае до 17 октомври, додека за вториот круг ќе продолжи до 31 октомври.
Дестан Јонузи
