Американскиот претседател Доналд Трамп изјави дека САД се „подготвени да им помогнат“ на иранските демонстранти, додека протестите низ Иран продолжуваат да ескалираат, а бројот на загинати, според достапните информации, надминал 500 лица.
Во изјавата, Трамп не прецизираше каква форма би имала американската поддршка, но порача дека Вашингтон „внимателно ја следи ситуацијата“ и дека „иранскиот народ има право на слобода и достоинство“.
Во меѓувреме, повеќе американски медиуми објавија дека администрацијата во Вашингтон разгледува низа можни опции како одговор на развојот на настаните во Иран. Според тие извештаи, сценаријата се движат од засилени кибернетички операции, преку дополнителни санкции, па сè до можни воени удари, иако официјална одлука засега не е донесена.
Тензиите дополнително се зголемуваат поради информациите за жестоки судири меѓу безбедносните сили и демонстрантите во повеќе ирански градови, како и за масовни апсења и ограничувања на интернетот.
Снимки од Иран прикажуваат стотици вреќи со тела
Серија видеоснимки објавени од Вахид, ирански блогер и интернет-активист познат по документирање на протестите, прикажуваат голем број вреќи со тела во форензичкиот центар Кахризак, јужно од Техеран, по насилното задушување на протестите во земјата.
ВОЗНЕМИРУВАЧКО ВИДЕО
Според достапните информации, на снимките може да се видат тела кои во мртовечницата биле донесени со товарни возила. Во еден од видеозаписите се појавува ознака „фотографија број … од 250“, што укажува на можен обем на жртвите, иако автентичноста и целосниот контекст на снимките засега не може независно да се потврдат.
Двајца сведоци кои го посетиле центарот Кахризак во потрага по исчезнати членови на своите семејства изјавиле за Iran International дека таму виделе повеќе од 400 тела. Нивните сведоштва доаѓаат во момент кога Иран е речиси целосно отсечен од интернет и други комуникациски канали, што значително ја отежнува независната проверка на информациите.
Според проценките на американската организација Human Rights Activists News Agency (HRANA), во протестите досега биле убиени повеќе од 560 луѓе.
На размерите на насилството укажуваат и изјавите на медицински работници. Лекар од северниот ирански град Рашт изјавил за Iran International дека само една болница примила најмалку 70 тела. Во градот Караџ, според истиот извор, во петокот 44 тела биле префрлени во болницата Мадани, додека уште 36 тела биле примени во болницата Гаем.
Иранските власти засега не објавиле официјални податоци за бројот на загинати. Државните медиуми и понатаму ги опишуваат демонстрантите како „наоружани изгредници“ и „терористи“, додека меѓународните организации повикуваат на независна истрага за случувањата.
Претседателката на Европскиот парламент Мецола ги повика иранските демонстранти да продолжат со протестите
Претседателката на Европскиот парламент Роберта Мецола денеска ги повика демонстрантите во Иран да продолжат со протестите, и покрај жестокиот одговор на властите на Исламската Република.
The yearning for liberty is inherent to all of us as human beings.
Iran’s new generation demand dignity and freedom. In 2026, it cannot be too much to ask for.
The killing must stop. The innocent and persecuted must be released. The repression must end.
To those brave girls,…
— Roberta Metsola (@EP_President) January 11, 2026
„Храбрите девојки, студентите, мажите и жените на улиците – ова е ваше време“, напиша Мецола на социјалната мрежа X, изразувајќи поддршка за граѓанските протести што со денови се одвиваат низ земјата.
Осврнувајќи се на блокадата на интернетот во Иран, таа додаде дека „секој режим што ја блокира комуникацијата е режим што се плаши од сопствениот народ“.
Во поостра порака упатена до иранското раководство, Мецола повика на итна промена на курсот, нагласувајќи дека достоинството и слободата не се преголемо барање во 2026 година.
„Убиствата мора да престанат. Невините и прогонетите мора да бидат ослободени. Мора да има крај на репресијата“, напиша таа.
Претседателката на Европскиот парламент исто така ги повика земјите членки на Европската Унија да го зголемат притисокот врз Техеран, иако не прецизираше на кој начин тоа треба да се направи, додавајќи дека „Европа мора да ја разбере својата должност и мора да дејствува“.
Генералниот секретар на ОН: Шокиран сум од насилството врз демонстрантите во Иран
Генералниот секретар на Обединетите нации Антонио Гутереш изјави дека е „шокиран“ од извештаите за насилство врз демонстрантите во Иран и ги повика иранските власти да покажат воздржаност.
Како што соопшти неговиот портпарол Стефан Дужарик, Гутереш е вознемирен од информациите за прекумерна употреба на сила од страна на безбедносните структури на Исламската Република против учесниците во протестите.
„Генералниот секретар е шокиран од извештаите за насилство и прекумерна употреба на сила од страна на иранските власти против демонстрантите“, изјави Дужарик, додавајќи дека Гутереш ги повикува властите во Техеран „да покажат максимална воздржаност и да се воздржат од непотребна или несразмерна употреба на сила“.
Германскиот шеф на дипломатијата: Иранскиот режим го изгуби легитимитетот
Германскиот министер за надворешни работи Јохан Вадефул изјави дека иранските власти го изгубиле својот легитимитет поради бруталното задушување на протестите и исклучувањето на интернетот во земјата.
„Луѓето протестираат против овој режим. Режим што го гаси интернетот и го ограничува правото на комуникација, во суштина, го изгубил својот легитимитет. Тие се плашат од сопственото население“, изјави Вадефул во видео објавено на Инстаграм.
Тој додаде дека за состојбата во Иран ќе разговара со американскиот државен секретар Марко Рубио за време на неговата посета на Вашингтон.
Редакција Фронтлајн
