Повеќе од 1.000 станбени згради во Кијив и натаму се без греење, откако Русија изврши разорен ракетен напад во петокот наутро, соопштија локалните власти. Нападот е дел од засиленото руско бомбардирање на украинската енергетска инфраструктура, кое трае од почетокот на инвазијата во 2022 година, пренесува ХИНА.
Украинскиот претседател Володимир Зеленски изјави дека работите за санација продолжуваат во погодените подрачја, оценувајќи дека состојбата „и понатаму е исклучително тешка“, особено во пограничните региони.
Според Зеленски, околу 200 екипи за итни интервенции се распоредени на терен и работат на поправка на оштетената инфраструктура во кијивскиот регион што го опкружува главниот град.
In many regions, the situation remains difficult after Russian strikes on our critical infrastructure. Energy workers and repair crews are working around the clock to restore electricity, heat, and water supply for people. And this is truly a monumental effort that matters… pic.twitter.com/1ZzvN3Zn0s
— Volodymyr Zelenskyy / Володимир Зеленський (@ZelenskyyUa) January 11, 2026
„Немав струја дома околу 55 часа. За да не плачам, едноставно се смеам“, изјави Лиза Лазаренко, која престојува во училиште во Кијив, привремено претворено во хуманитарно засолниште.
Зеленски претходно соопшти дека Русија во изминатата недела употребила повеќе од 1.100 дронови, над 890 наведувани воздушни бомби и повеќе од 50 ракети – вклучувајќи балистички, крстосувачки и проектили со среден дострел.
По ракетниот напад врз Кијив во петокот, речиси целиот град остана без струја и греење во услови на екстремно ниски температури. Дури во неделата властите успеале делумно да ја обноват испораката на вода и електрична енергија.
Зеленски изјави дека Русија намерно чекала настапување на студеното време за да ја влоши хуманитарната состојба и го опиша нападот како „циничен руски терор насочен особено против цивилите“.
Кијивскиот градоначалник Виталиј Кличко порача дека санацијата продолжува, но дека состојбата со снабдувањето со енергија во главниот град „и понатаму е многу тешка“.
Во меѓувреме, украинското Министерство за енергетика соопшти дека руските сили во текот на ноќта повторно го нападнале електроенергетскиот систем, што довело до краткотрајни прекини на струјата во југоисточните региони Дњепропетровск и Запорожје.
Украинската премиерка Јулија Свириденко изјави дека оваа седмица „немало ниту еден ден без напад врз енергетски објекти и клучна инфраструктура“, додавајќи дека биле регистрирани вкупно 44 напади.
Редакција Фронтлајн
